Azərbaycan Prezidenti İLHAM ƏLİYEV bəyanatla çıxış edərək dedi:

-Hörmətli cənab Prezident!

Hörmətli qonaqlar, xanımlar və cənablar!

İlk növbədə, cənab Prezident, Sizi və nümayəndə heyətinizi Azərbaycanda bir daha səmimiyyətlə salamlayıram. Azərbaycana xoş gəlmisiniz!

Bu səfər Suriya Prezidentinin Azərbaycana ilk rəsmi səfəridir. Biz bu səfərə çox böyük əhəmiyyət veririk. Əminəm ki, səfər çox uğurlu keçəcək və səfər sayəsində Suriya-Azərbaycan əlaqələri daha da inkişaf edəcəkdir. Buna nail olmaq üçün bütün imkanlar vardır. Biz bu gün çox geniş fikir mübadiləsi apardıq. Həm ikitərəfli münasibətlər müzakirə edildi, regional məsələlərə vaxt ayrıldı, eyni zamanda, əminəm ki, imzalanmış sənədlər münasibətlərimizin inkişafında çox mühüm rol oynayacaqdır.

Suriya-Azərbaycan münasibətlərinin çox gözəl perspektivləri vardır. Biz bu münasibətlərə xüsusi əhəmiyyət veririk və bildiyiniz kimi, keçən ildən başlayaraq Suriyada Azərbaycanın səfirliyi fəaliyyət göstərir. Biz beynəlxalq təşkilatlarda çox uğurlu əməkdaşlıq edirik. BMT və İslam Konfransı Təşkilatı çərçivəsində əməkdaşlığımız ölkələrimiz arasında ikitərəfli münasibətlərin möhkəmlənməsinə xidmət göstərir və eyni zamanda, regional müstəvidə birgə səylərimiz uğur gətirir.

İslam Konfransı Təşkilatı çərçivəsində birgə səylərimiz də çox təqdirəlayiqdir. Biz Azərbaycanda islam həmrəyliyinin möhkəmlənməsi üçün əməli tədbirlər həyata keçiririk. Bakı şəhəri bu il İslam Mədəniyyətinin paytaxtı elan edilibdir. Gələcəkdə bu istiqamətdə atılacaq müştərək addımlar bütün İslam dünyasının birləşməsinə xidmət göstərəcəkdir.

Əminəm ki, siyasi əlaqələr gələcəkdə sürətlə inkişaf edəcəkdir. İqtisadi sahədə yaxşı perspektivlər vardır və əminəm ki, sabah keçiriləcək birgə biznes forum iş adamları arasında əməkdaşlığın dərinləşməsinə xidmət göstərəcəkdir. Müxtəlif imkanlar var, müxtəlif təşəbbüslər irəli sürülə, birgə layihələr icra oluna bilər. Biz buna hazırıq və çox böyük maraq göstəririk.

Regional məsələlərin müzakirəsinə də bu gün vaxt ayrıldı və mən cənab Prezidentə Ermənistan-Azərbaycan, Dağlıq Qarabağ münaqişəsi ilə bağlı yaranmış vəziyyət haqqında fikirlərimi bildirdim. Bildiyiniz kimi, Azərbaycan torpaqları uzun illərdir işğal altındadır, 15 ildən artıqdır ki, atəşkəs elan olunubdur, ancaq hələ ki, məsələ öz həllini tapmamışdır.

Biz məsələnin beynəlxalq hüquq normalarına uyğun həll olunmasına tərəfdarıq və BMT Baş Məclisinin qərarları və Təhlükəsizlik Şurasının dörd qətnaməsi erməni silahlı qüvvələrinin işğal edilmiş torpaqlardan qeyd-şərtsiz çıxarılmasını tələb edir. Digər beynəlxalq təşkilatların qərarları da bizim mövqeyimizi müdafiə edir. Bu işğala son qoyulmalıdır və Azərbaycanın ərazi bütövlüyü bərpa olunmalıdır. O ki qaldı Ermənistan tərəfinin bəzən səsləndirdiyi tezislərə - xalqların öz müqəddəratını təyin etmək hüququna, qeyd etmək istəyirəm ki, erməni xalqı öz müqəddəratını artıq müəyyən edib. Ermənistan müstəqil dövlətdir və əlbəttə ki, məsələnin həlli yalnız ərazi bütövlüyü prinsipləri əsasında mümkündür.

Cənab Prezident, mən bu gün çox şadam ki, bizim aramızda şəxsi münasibətlər də yaranır. Əminəm ki, bu münasibətlərin də çox yaxşı gələcəyi vardır və şəxsi münasibətlər tarixdə çox mühüm rol oynayır. Bu gün qeyd edildi ki, bizim atalarımız da bir-biri ilə çox yaxşı əməkdaşlıq edirdilər, bir-birini tanıyırdılar, onları dostluq münasibətləri bağlayırdı. Əminəm ki, biz də bu gözəl ənənəni davam etdirəcəyik.

Hörmətli cənab Prezident, Sizi Azərbaycanda bir daha səmimiyyətlə salamlayıram. Sizə və bütün Suriya xalqına xoşbəxtlik arzulayıram.

X X X

Suriya Prezidenti BƏŞŞAR ƏL-ƏSƏD bəyanatla çıxış edərək dedi:

-Çox sağ olun, cənab Prezident, qardaşım İlham Əliyev!

Bu gözəl sözlərə görə minnətdaram. Bu sözlər bizim aramızda, ölkələrimiz arasında - Suriya ilə Azərbaycan arasında münasibətləri tam ifadə edir. Bu əlaqələr tarixi əlaqələrdir. Azərbaycan xalqına, Azərbaycan hökumətinə və dost Azərbaycana minnətdarlığımı bildirirəm.

Mən və nümayəndə heyətim çox isti qarşılandı. Bu səfərin həyata keçirilməsi yolunda atılan bütün addımlara görə minnətdarlığımı bildirirəm və əminəm ki, bu səfər çox uğurlu olacaqdır. Ölkələrimiz arasındakı münasibətlər tarixi münasibətlərdir.

Suriya Prezidenti dedi ki, ölkələrimizi tarix boyu Böyük İpək Yolu bağlamışdır. Bu, ondan irəli gəlir ki, hər iki ölkənin strateji mövqeyi vardır. Xalqlarımız arasındakı münasibətlərin qardaşlıq münasibətləri olduğunu bildirən Bəşşar əl-Əsəd dedi:

-Azərbaycan şairi Nəsiminin həyat və yaradıcılığı ölkələrimiz arasındakı münasibətlərin dərinliyinə dəlalət edir. Bu şair altı əsr bundan əvvəl Suriyada yaşayıb-yaratmışdır. O, böyük şairdir, böyük filosofdur. Suriyada dəfn olunmuş Nəsiminin məqbərəsinin daha da gözəlləşdirilməsi, yenidən bərpası barədə hökumətlər arasında razılıq əldə olunmuşdur.

-Azərbaycana bu səfərim iki dost ölkə arasında bu qəbildən olan birinci səfərdir. Bu səfərin əsasını güclü bünövrə təşkil edir. Bu əlaqələrimizin, münasibətlərimizin strateji əhəmiyyəti vardır. Bu münasibətlər gələcəyə istiqamətlənib və bütün sahələri əhatə edəcəkdir. Bir sıra sənədlər imzalanmışdır və yaxın saatlarda da digər sənədlər - ticarət, gömrük, maliyyə, sənaye, informasiya, təhsil sahələrinə və digər sahələrə dair bir sıra anlaşma memorandumları imzalanacaqdır. Bu səfərin əsas məqsədi ondan ibarətdir ki, ölkələrimiz arasında qapıları tam açaq. Özəl sektor, Suriya və Azərbaycan iş adamları arasında qapıları tam açaq.

Qafqaz, Yaxın Şərq və Balkan həm dünya, həm də bölgə səviyyəsində olduqca mühüm və dinamik bölgələrdir. Əsrlər boyu bu bölgələr çox mühüm regionlar olmuşlar. Eyni zamanda, cənab Prezident İlham Əliyev də mənə ətraflı məlumat verdi. Mən də ona ətraflı məlumat verdim. Ölkələrimizin yaşadığı problemlər barədə, eyni zamanda, tarixi təcrübələrimiz, yaşadığımız problemlər barədə fikir mübadiləsi apardıq. Şübhəsiz ki, Qafqaz və Yaxın Şərq regionları dünyanın ürəyini təşkil edir və bu regionlar arasında birbaşa əlaqələrin yaradılması və bütün problemlərin həlli olduqca vacibdir. Biz Yaxın Şərq regionunda sabitlik və sülh prosesi, 1991-ci ildən bəri başladığımız sülh danışıqları və üzləşdiyimiz problemlər barədə danışdıq.

Sonra Suriya Prezidenti İsraillə aparılan danışıqlar barədə məlumat verdi:

-Bütün işğal olunmuş ərazilər azad olunmalı, ələlxüsus Suriyanın işğal olunan əraziləri - Holan təpələri sahiblərinə qaytarılmalıdır. Mən cənab Prezidentə sülhlə bağlı bizim mövqeyimiz barədə ətraflı məlumat verdim və bildirdim ki, bizim tərəfdən heç bir güzəşt ola bilməz. Şübhəsiz ki, işğal altındakı ərazilər azad edilməsə Yaxın Şərqdə heç vaxt sülh bərqərar ola bilməz. Mən cənab Prezidentə Fələstinin Qəzzə zolağının blokadası, Fələstindəki ağır vəziyyət barədə məlumat verdim. Bildirdim ki, bu blokada aradan qaldırılmalıdır. Fələstinlilər öz aralarında müəyyən razılığa gəlməlidirlər. Bundan sonra fələstinlilərlə israillilər arasında razılıq əldə olunmalıdır və sülh prosesi kamil şəkildə həyata keçirilməlidir. Biz sülhə nail olmaqdan imtina etmirik, lazımi şərait olandan sonra biz münasib vaxtda sülhə nail ola bilərik.

Suriyanın dövlət başçısı Ermənistan-Azərbaycan, Dağlıq Qarabağ münaqişəsi ilə bağlı fikirlərini də bölüşdü:

-Azərbaycanın mövqeyi beynəlxalq qanunlar çərçivəsinə söykənir. Təbii ki, problem nə qədər tez həll olunarsa, bir o qədər faydalı olar. Çünki problemlər xroniki xəstəliklər kimi nə qədər uzanırsa, onların həll olunması da o qədər çətin olur. Böyük xəstəliklər qəflətən gəlir. Lakin xəstəlikləri müalicə etmək lazımdır, problemləri tez həll etmək lazımdır. Suriyanın da bu prosesdə çox böyük rolu ola bilər. Suriyanın həm Azərbaycan, həm də erməni tərəfi ilə yaxşı münasibətləri vardır. Suriya bu məsələnin həllinə öz töhfəsini verə bilər.

Bu gün axşam və sabah da Azərbaycanda görüşlərimiz olacaqdır. Biz Sizinlə tam razıyıq və fikirləşirik ki, problemlərə dair mövqelərimiz üst-üstə düşür. Üzləşdiyimiz problemlər, hər iki regionun problemləri bir-birinə oxşayır. Əminəm ki, bu səfərin nəticələri uğurlu olacaqdır və əməkdaşlıq üçün qapıları daha geniş açacaqdır.

Bir daha qardaşım Prezidentə xoşbəxtlik və dost Azərbaycan xalqına əmin-amanlıq, çiçəklənmə arzulayıram.

Çox sağ olun.