Dünyada 800 milyondan çox insan aclıqdan əziyyət çəkir
Bakı, 15 oktyabr, AZƏRTAC
Müharibələrin, koronavirus pandemiyasının və iqlim dəyişikliyinin səbəb olduğu aclıqdan əziyyət çəkən insanların sayı il ərzində 25 faiz artaraq 800 milyon nəfəri ötüb.
AZƏRTAC “Deutsche Welle” media kompaniyasına istinadla xəbər verir ki, bu rəqəm aclıqdan əziyyət çəkənlərə yardım göstərən Almaniyanın “Welthungerhilfe” qeyri-hökumət təşkilatının məruzəsində yer alır.
Oktyabrın 14-də Berlində dərc olunan məruzədə qlobal aclıq indeksinin (GHI) sonuncu göstəriciləri nəzərə alınıb. Məruzəyə əsasən, hazırda dünyada aclıqdan əziyyət çəkən insanların sayı 811 milyon nəfərə çatıb. Bundan başqa, 41 milyon insan aclıq astanasında yaşayır.
Sənəddə qeyd olunur ki, bu il vəziyyətin ağırlaşmasına iqlim dəyişikliyi, koronavirus pandemiyası, həmçinin son zamanlar artan müharibələr və münaqişələr səbəb olub. Aclıqdan ən çox əziyyət çəkən Afrika və Asiya ölkələridir.
Bölmənin digər xəbərləri
