Əbu-Dabidə Dünya Təbiəti Mühafizə konqresi keçiriləcək
Qahirə, 24 aprel, AZƏRTAC
Oktyabrın 9-dan 15-dək Əbu-Dabidə Dünya Təbiəti Mühafizə Konqresi keçiriləcək.
AZƏRTAC yerli mediaya istinadla xəbər verir ki, Beynəlxalq Təbiəti Mühafizə Birliyi (IUCN) tərəfindən təşkil ediləcək tədbirdə 160 ölkədən mütəxəssislərin, əlaqədar qurumların rəhbərlərinin, ümumilikdə 10 mindən çox qonağın iştirakı gözlənilir.
IUCN təşkilatının baş direktoru Qretel Aqilar bildirib ki, konqres dünyada hökumətləri, vətəndaş cəmiyyəti institutlarını və ekspertləri “Təbiəti qiymətləndirən və qoruyan ədalətli dünya” hədəfi ətrafında birləşdirən bir tədbirdir. Əlavə edib ki, konqres dünyada təbiətin mühafizəsi üçün qarşıya qoyulmuş ortaq hədəf uğrunda fəaliyyət göstərmək üçün yaxşı fürsətdir.
Qeyd edək ki, Beynəlxalq Təbiəti Mühafizə Birliyi 1948-ci ildə yaradılıb. Mərkəzi iqamətgahı İsveçrənin Qland şəhərində yerləşir. İlk beynəlxalq ekologiya təşkilatı sayılır. Ətraf mühitlə əlaqəli 1400-dən çox hökumət və qeyri-hökumət təşkilatını, eləcə də dünya ölkələrindən 17 mindən çox eksperti özündə birləşdirir.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
