“Ekol Mühəndislik Xidmətləri” QSC cari ildə yeni layihələrin icrasına başlayacaqdır
Bakı, 24 fevral (AZƏRTAC). “Ekol Mühəndislik Xidmətləri” Qapalı Səhmdar Cəmiyyəti (QSC) cari ildə bir sıra ekoloji layihələrin həyata keçirilməsini planlaşdırır. QSC-dən AZƏRTAC-a verilən məlumata görə, bu layihələr sırasında “Azneft” İstehsalat Birliyinin “Balaxanıneft” NQÇİ-nin 2-ci mədən sahəsində həyata keçiriləcək rekultivasiya və bioremediasiya layihəsi ərazinin yaşayış məntəqələri ilə əhatə olunması baxımından xüsusilə əhəmiyyətlidir. Layihəyə “Balaxanıneft” NQÇİ-nin 23,7 hektar neftlə çirklənmiş sahəsi daxildir.
Layihənin ilkin mərhələsində ərazidə kompleks ekoloji monitorinq aparılmış, neftlə çirklənmiş sahələrin parametrləri müəyyənləşdirilmiş, neft şlamının və gölməçələrdə olan suların ümumi həcmi dəqiqləşdirilmişdir. Müəyyən edilmişdir ki, ərazidə 124,9 min kubmetrdən çox müxtəlif dərəcəli çirklənmə parametrlərinə malik neft şlamı, 70,3 min kubmetrdən çox mədən axıntı suları vardır. Çirklənmə parametrlərindən asılı olaraq 98,7 min kubmetr neft şlamının bioremediasiya sahəsinə daşınaraq utilizasiya olunması nəzərdə tutulmuşdur.
Bu layihə, ərazidəki yaşayış məntəqələrini çirklənmə mənbələrindən azad etməklə yanaşı, ətraf ərazilərin ekoloji vəziyyətinin yaxşılaşdırılmasına da müsbət təsirini göstərəcəkdir.
Bölmənin digər xəbərləri
