Elçin Əhmədov: 20 Yanvar hadisələri dünyaya xalqımızın müstəqillik yolunda əzmini göstərdi
Bakı, 19 yanvar, AZƏRTAC
Tariximizin bugünkü şanlı səhifəsinin keşməkeşli yolu olub. Keçmiş SSRİ dövründə imperiya ordusu 1990-cı ildə xalqımıza qarşı 20 Yanvar faciəsini törədib. Həmin il yanvarın 19-dan 20-nə keçən gecə həyata keçirilən qanlı qırğın heç vaxt yadımızdan çıxmaz.
Bu fikirləri AZƏRTAC-a müsahibəsində Bakı Dövlət Universitetinin kafedra müdiri dosent Elçin Əhmədov bildirib. E.Əhmədov qeyd edib ki, 20 Yanvar qırğınına istiqamətlənən yolun ilk mərhələlərindən biri fikrimcə, 1988-ci ilin noyabr ayında Qərbi azərbaycanlıların öz torpaqlarından çıxarılması oldu. Keçmiş SSRİ rəhbərliyinin xalqımıza qarşı apardığı təcavüz siyasətinin başlanğıcına bu amil stimul verdi. 200 mindən çox Qərbi azərbaycanlının öz dədə-baba torpaqlarından çıxarılması xalqımıza qarşı aparılan ədalətsizliyin ilk mərhələsi oldu. Bundan sonra 20 Yanvar faciəsi törədildi. Çoxlu sayda şəhidlərimiz oldu. 20 Yanvar tariximizin həm qanlı, həm də şanlı səhifəsidir. Bu hadisə xalqımızın azadlıq, müstəqillik yolunda əzmini, iradəsini və fədakarlığını göstərdi.
Azərbaycan Prezidenti, Müzəffər Ali Baş Komandan İlham Əliyevin rəhbərliyi, şanlı Ordumuzun gücü ilə Vətən müharibəsində biz böyük Zəfər qazandıq, torpaqlarımız işğaldan azad edildi. Biz böyük Qələbəmizlə sonsuz qürur hissləri keçiririk.
“Doğma torpaqlarından didərgin düşmüş soydaşlarımız bu gün öz yurdlarına qayıdırlar. Bu Qayıdış böyük sevinc hissləri doğurur. Qərbi Azərbaycandan olan soydaşlarımızın da hüquqları təmin ediləcək, onlar da öz ata-baba torpaqlarına qayıdacaqlar”, - deyə alim bildirib.
Bölmənin digər xəbərləri
