Elçin Mirzəbəyli: Aİ missiyasının bölgədə mövcudluğu sülh prosesinə yalnız zərbə vurur
Bakı, 23 fevral, AZƏRTAC
Münxen Təhlükəsizlik Konfransından bir neçə, Avropa İttifaqının missiyasının Ermənistana gəlişindən isə bir gün sonra Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri tərəfindən Azərbaycan Ordusunun Kəlbəcər rayonunun Təzəkənd yaşayış məntəqəsi, Şuşa şəhəri və Xocavənd rayonu istiqamətlərində yerləşən mövqeləri atəşə tutulub. Bu, rəsmi İrəvanın məqsədyönlü şəkildə həyata keçirdiyi təxribat kimi qiymətləndirilməlidir.
Bunu AZƏRTAC-a açıqlamasında siyasi ekspert Elçin Mirzəbəyli söyləyib.
E.Mirzəbəylinin sözlərinə görə, bu təxribatın səbəblərindən biri Münxen Təhlükəsizlik Konfransında növbəti dəfə rəzil duruma düşən və ölkəsində kəskin tənqidlərə məruz qalan Ermənistanın baş naziri Nikol Paşinyanın diqqəti rüsvayçı məğlubiyyətindən yayındırmaqdır. Digər səbəb Münxendə “Paşinyanın yanında olacağını” bəyan edən Emmanuel Makronun sözünün arxasında dura bilməməsi və ABŞ Dövlət katibinin iştirakı ilə Azərbaycan Prezidenti ilə Ermənistanın baş naziri arasında keçirilən görüşdə qapı arxasında qalmasıdır. Görünür, Paşinyan-Makron cütlüyünün növbəti dəfə iflasa uğraması, Ermənistanın baş nazirini təkidlə Münxenə çağıran Fransa Prezidentinin onsuz da yerində olmayan əsəblərini tamamilə sıradan çıxarıb və atəşkəsin bir neçə istiqamətdə pozulmasına zəmin yaradıb.
Siyasi ekspert bildirib ki, Prezident İlham Əliyevin Münxen Təhlükəsizlik Konfransında Azərbaycanda “Dağlıq Qarabağ” adlı inzibati ərazi vahidinin olmadığını, erməni əhalinin yaşadığı Qarabağ rayonunun olduğunu bəyan etməsi, beynəlxalq hüququn subyektlərini Azərbaycanın suverenliyinə və Konstitusiyasına hörmətlə yanaşmağa çağırması, həmçinin Qarabağa “ixrac edilmiş”, yaxud “gizli yollarla keçirilmiş”, bu əraziyə hər hansı bir formada aidiyyəti olmayan şəxslərlə hər hansı bir müzakirənin aparılmasının istisna olduğunu bildirməsi, Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvlərini də hərəkətə gətirib. Separatçılar həm öz mövcudluqlarını nümayiş etdirmək, həm də sülhməramlıların öz missiyalarını yerinə yetirmək iqtidarında olmadığı mənzərəsini yaratmaq üçün təxribata əl atıblar.
“Hazırda göz önündə olan reallıq ondan ibarətdir ki, Avropa İttifaqı missiyasının bölgədəki mövcudluğu sülh prosesinə yalnız zərbə vurur və Ermənistan sözügedən missiyadan “qoruyucu örtük” kimi istifadə etməklə təxribatlarını davam etdirmək, öhdəliklərini yerinə yetirməkdən yayınmaq istəyir. Qeyd edim ki, Aİ-nin daha öncəki, 40 nəfərlik missiyasının Ermənistana gəlişindən sonra da rəsmi İrəvan eyni davranışları sərgiləmişdi. Əslində, 40 nəfərdən ibarət missiyanın Ermənistanda mövcudluğunun sülh prosesinə heç bir töhfə verməməsi, əksinə, gərginliyin artmasına zəmin yaratması, Aİ-nin bölgəyə yeni bir missiya göndərməməsi üçün yetərincə əsas verirdi. Lakin Fransa və bu kimi Cənubi Qafqazda sülhün, əmin-amanlığın təmin olunmasında maraqlı olmayan ölkələrin canfəşanlığı Ermənistana yeni, həm də mahiyyət etibarilə hərbçilərdən, silahlı şəxslərdən ibarət missiyanın göndərilməsinə zəmin yaratdı və nəticə göz qabağındadır.
Mövcud vəziyyət Ermənistanın sülh prosesinin real məcraya qədəm qoymaması üçün ən müxtəlif bəhanələrə əl atmasının gerçək səbəbləri barədə Azərbaycan tərəfinin dəfələrlə dilə gətirdiyi fakt və arqumentlərin həqiqiliyini bir daha sübuta yetirir. Ermənistanın məqsədi bölgəyə regiondan kənar qüvvələri gətirməkdən, Cənubi Qafqazı Fransa kimi ölkələrin poliqonuna çevirməkdən ibarətdir. Daha doğrusu, rəsmi İrəvan bölgədə təhlükəsizliyə təminat verən mexanizmlərin sıradan çıxarılması və regionun kənar müdaxilələrə açıq olması üçün verilən sifarişləri yerinə yetirir.
Amma Ermənistan və bölgəni yenidən qana boyamaqda maraqlı olan qüvvələr unudurlar ki, 44 günlük müharibə nəticəsində regionda yaranan reallıqların dəyişdirilməsi istiqamətində edilən bütün cəhdlər iflasa uğrayacaq və rəsmi İrəvan üçün daha ağır nəticələrə yol açacaq. Azərbaycan dövləti Ermənistandan fərqli olaraq, kənardan ötürülən hesabına cəsarətlənmir, öz potensialına, öz haqqını qoruyan Azərbaycan xalqının iradəsinə, müzəffər Azərbaycan Ordusunun gücünə arxalanır”, - deyə Elçin Mirzəbəyli vurğulayıb.
Siyasi ekspertin sözlərinə görə, baş verənlərdə maraq doğuran məqamlardan biri də Aİ-nin Ermənistandakı de-fakto hərbi missiyası ilə bağlı “qırmızı qələmi” əlindən yerə qoymayan, az qala havaya da “qırmızı xətt” çəkən İranın mövqeyi qətiyyən nəzərə çarpmır.
Rusiya Aİ-nin missiyasının Ermənistanda yerləşməsinə mənfi münasibət bəsləsə də, getdikcə kənar qüvvələrin bölgədə hərbi iştirakına çevrilən prosesin qarşısının alınması istiqamətində rəsmi Moskvanın real səylərinin şahidi olmuruq. Reallıq isə ondan ibarətdir ki, Ermənistan rəhbərliyinin bölgəyə xarici qüvvələrin cəlb edilməsi istiqamətində atdığı addımlar daha çox Rusiyanın Cənubi Qafqazdan sıxışdırılıb çıxarılmasına, Moskvanın bir zamanlar “forpost” gözündə gördüyü Ermənistanın Fransa kimi ölkələrin “avanpost”una çevrilməsinə xidmət edir.
Bölmənin digər xəbərləri
