Əli Əhmədov: Azərbaycanda heç vaxt dini radikalizm olmayıb
Bakı, 5 dekabr, Samirə Allahverdiyeva, AZƏRTAC
Azərbaycanda heç vaxt dini radikalizm olmayıb, amma vaxtilə siyasi radikalizmin ölkəyə necə ziyan gətirdiyinin şahidi olmuşuq. Ulu öndər Heydər Əliyevin ikinci dəfə hakimiyyətə gəlməsi ilə ölkəmizdə siyasi radikalizmə də son verildi və sabit inkişafın əsası qoyuldu.
AZƏRTAC xəbər verir ki, bu fikirləri Baş nazirin müavini, Yeni Azərbaycan Partiyasının sədr müavini-icra katibi Əli Əhmədov Dini Qurumlarla İş üzrə Dövlət Komitəsinin və Binəqədi Rayon İcra Hakimiyyətinin birgə təşkilatçılığı ilə “Milli mənəvi dəyərlər: tarixilik, varislik və müasirlik” mövzusunda gənclərlə keçirilən görüşdə səsləndirib.
Əli Əhmədov deyib ki, bu gün yaşadığımız regionun ətrafında baş verən hadisələr fonunda radikalizm deyilən bir anlayış özünü açıq şəkildə göstərir və çox təəssüf ki, bu, İslam dini radikalizmi formasında bəşəriyyətə təqdim edilir. Sabitliyin, dincliyin olmadığı və əvəzində radikalizmin kök saldığı yerdə inkişafdan danışmaq yersizdir. Radikalizmin gücləndiyi yerdə heç bir dialoqdan söhbət gedə bilməz və bunun da sonu fəlakətdir. Azərbaycan vətəndaşları radikalizmin sülh və sabitlik üçün nə qədər təhlükəli olduğunu yaxşı bilirlər.
Baş nazirin müavini insan həyatında mənəviyyatın, cəmiyyətin mənəvi sferasının tənzimlənməsində milli mənəvi dəyərlərin, habelə dinin rolundan danışıb. Bildirilib ki, bir sıra ölkələrdə dini radikalizmin meydana gəlməsinin əsas səbəblərindən biri dinin ictimai-siyasi tənzimləyici rolunu oynamağa çalışmasıdır. Çünki ictimai-siyasi prosesləri formalaşdıran digər amillər də var. Məsələn, müxtəlifyönümlü partiyalar, QHT-lər mövcuddur ki, onlar da ictimai-siyasi proseslərin tənzimlənməsində rol oynayır. Amma elə cəmiyyətlər də var ki, din təkcə milli mənəvi dəyərlər yox, həm də siyasi tənzimləyici rolunu radikalizm formasında oynamağa başlayıb. Bir sıra müsəlman ölkələrində dini radikalizmin meydana gəlməsinin səbəbi orada dinin ictimai-siyasi tənzimləyici rolunu oynamağa çalışmasıdır. Bu, Azərbaycana xas olmayan hal olsa da, biz yenə də ayıq-sayıq olmalıyıq. Din milli mənəvi dəyərlərin nüvəsi rolunda çıxış etməlidir, müəyyən məsələlərə təkan verməlidir, lakin ictimai-siyasi tənzimləyici rolunda çıxış etməməlidir. Belə olan halda cəmiyyətdə radikalizmin də meydana gəlməsinin qarşısı alınar.
Sonra gəncləri maraqlandıran suallar cavablandırılıb.
Bölmənin digər xəbərləri
