Elm və təhsil naziri Hacıqabulda “Son zəng” tədbirlərində iştirak edib
Bakı, 14 iyun, AZƏRTAC
İyunun 14-də elm və təhsil naziri Emin Əmrullayev Hacıqabul rayonunda 10 nömrəli və Muğan qəsəbə tam orta ümumi təhsil məktəblərində keçirilən “Son zəng” tədbirlərində iştirak edib.
Nazirlikdən AZƏRTAC-a bildirilib ki, əvvəlcə Ulu Öndər Heydər Əliyevin abidəsi ziyarət edilib, önünə gül dəstələri düzülüb.
“Son zəng” tədbirləri Dövlət Himninin səsləndirilməsi və şəhidlərin xatirəsinin bir dəqiqəlik sükutla yad edilməsi ilə başlayıb.
Nazir Emin Əmrullayev bu il ölkə üzrə 113 minə yaxın şagirdin məzun olduğunu diqqətə çatdırıb. Onların sırasında “Böyük Qayıdış”la yenidən canlanan işğaldan azad edilmiş torpaqlarımızın məzunlarının da yer aldığını vurğulayıb.
Nazir “Son zəng” ifadəsindəki son anlayışının isə əslində məzunlar üçün yeni başlanğıc olduğunu bir daha xatırladıb və həyatlarının yeni mərhələsində onlara uğurlar arzulayıb.
Hacıqabul Rayon İcra Hakimiyyətinin başçısı Sevindik Hətəmov da məzunları təbrik edib, onlara uğurlar arzulayıb.
Çıxışlardan sonra tədbir şagirdlərin hazırladıqları “Son zəng” adlı ədəbi-bədii kompozisiya ilə davam etdirilib.
Qeyd edək ki, bu il Hacıqabul rayonu 10 nömrəli tam orta ümumtəhsil məktəbinin 16 nəfər, Muğan qəsəbə tam orta ümumtəhsil məktəbinin isə 24 nəfər şagirdi məzun olur.
Bölmənin digər xəbərləri
