Ərdoğan: Silahlı Qüvvələr Türkiyənin bütövlüyü və birliyinin qarantıdır
Ankara, 30 avqust, AZƏRTAC
“Silahlı Qüvvələr Türk xalqının qürurudur, Türkiyənin bütövlüyünün və birliyinin qarantıdır. Ordumuz dünyanın ən güclü orduları sırasındadır”.
AZƏRTAC xəbər verir ki, bu barədə Türkiyə Prezidenti Rəcəb Tayyib Ərdoğan Ankarada Türkiyə Milli Müdafiə Universitetinin nəzdindəki Quru Qüvvələri Ali Hərbi Məktəbində çıxış edərək bildirib.
Dövlət başçısı vurğulayıb ki, Türkiyə Ordusu çoxsaylı əməliyyatlar o cümlədən terrorizmlə mübarizədə dəfələrlə peşəkarlıq nümayiş etdirib. “Düşmənlərin fitnələrinə baxmayaraq, ordumuz güclənməkdə davam edir. Suriya, İraq, Liviya və Somalidəki uğurlu missiyalar bunu sübut edir”, - deyə Prezident vurğulayıb.
Ərdoğan deyib ki, məqsədlərdən geri çəkilmək Türkiyəyə qarşı ciddi təhdidlərin formalaşmasına gətirib çıxaracaq. “Belə bir mürəkkəb regionda müstəqil və güclü siyasət heç də hər bir ölkənin öhdəsindən gələ biləcək iş deyil. Bölgədəki prosesləri görməmək özümüzü aldatmaq deməkdir”, - deyə Ərdoğan bildirib.
Siyasətçi qeyd edib ki, Adriatik dənizindən tutmuş Asiya çöllərinə qədər bütün həmvətənlərimizin vəziyyəti Türkiyənin maraqlarına daxildir.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
