Ərdoğan: Türkiyə inkişafının yeni mərhələsinə qədəm qoyur
Ankara, 14 iyul, AZƏRTAC
Türkiyə inkişafının yeni mərhələsinə daxil olur. Ölkə “terrorizm qandallarını” üzərindən atır və 47 ildən sonra bu bəlanı tamamilə gündəlikdən çıxarmağa yaxındır.
AZƏRTAC xəbər verir ki, bunu Türkiyə Prezidenti Rəcəb Tayyib Ərdoğan Ankarada hakim Ədalət və İnkişaf Partiyasının (AKP) funksionerləri qarşısında çıxış edərkən bildirib.
Dövlət başçısı PKK terror təşkilatının tərksilah olması və öz-özünü buraxması prosesinin sabotaj edilməsinin yolverilməz olduğunu vurğulayıb. “Siyasətdə və həyatda bir çox səhvi aradan qaldırmaq mümkündür, lakin 86 milyonluq Türkiyə vətəndaşının birliyinə və təhlükəsizliyinə vurulan ziyanı bağışlamaq olmaz. Xalq bunu əsla unutmaz”, – deyə Ərdoğan bildirib.
Prezident “terrorsuz Türkiyə”ni rifah səviyyəsi daim yüksələn, sürətlə inkişaf edən bir ölkə kimi xarakterizə edib. “Hökumətin indiyədək terrorla mübarizəyə sərf etdiyi vəsaitləri artıq sosial ehtiyaclara, investisiyalara, nəhəng layihələrə yönəldə biləcəyik. Nəticədə, yeni iş yerləri açılacaq, pensiyalar artırılacaq. Bundan bütün xalq faydalanacaq”, – deyə Türkiyə lideri əlavə edib.
Ərdoğanın sözlərinə görə, hazırda müəyyən qüvvələr Türkiyəni “qlobal dəyişikliklər dalğasından” kənarda saxlamağa, daxili məsələlərlə məşğul olmağa məcbur etməyə çalışır. “Türkiyənin inkişafına qarşı duran, Ankaranın strateji təşəbbüslərini pozmağa çalışan qüvvələrin kimlər olduğunu çox yaxşı bilirik. Kuklaların arxasındakı kuklaoynadanları da görürük”, – deyə Ərdoğan vurğulayıb.
Dövlət başçısı həmvətənlərini birliyə və təfriqədən uzaq durmağa çağırıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
