Erməni saxtakarlıqlarının ifşa olunması üçün qətiyyətli addımlar atılmalıdır
Bakı, 18 aprel, AZƏRTAC
Aprelin 18-də Azərbaycan Universitetində “Uydurma erməni soyqırımı: yalanlar, iftiralar. Türk-müsəlman soyqırımı: faktlar, həqiqətlər” mövzusunda ikinci beynəlxalq elmi konfrans keçirilib.
Azərbaycan Universiteti, Azərbaycan Milli Elmlər Akademiyasının (AMEA) A.A.Bakıxanov adına Tarix İnstitutu, Gənclərin Elmi Araşdırmalarına Dəstək İctimai Birliyi və “Səs” Media Qrupunun birgə keçirdiyi konfrans ümummilli lider Heydər Əliyevin anadan olmasının 92-ci və hakimiyyətə qayıdışının 22-ci ildönümünə həsr edilib.
AZƏRTAC xəbər verir ki, əvvəlcə tədbir iştirakçıları ulu öndər Heydər Əliyevin universitetin foyesindəki büstü önünə əklil qoyub, xatirəsini ehtiramla yad ediblər.
Konfransın plenar iclasında Azərbaycan Universitetinin rektoru Fərid Əhmədov ermənilərin zaman-zaman tarixi saxtalaşdırmaq cəhdlərindən, azərbaycanlı alim və tarixçilərin erməni müəlliflərin ifşa olunmasında qətiyyətli addımlarından danışıb. Rektor Azərbaycanın XIX əsrdə İran və Türkiyədən Qafqaza köçürülən, XX əsrin əvvəllərində isə əzəli torpaqlarımızda yaradılan və terroru dövlət siyasəti səviyyəsinə qaldıran Ermənistanla qonşu olmaq məcburiyyətində qaldığını, bu qonşuluğun xalqımıza qarşı daim soyqırımı, terror, kütləvi qətllərlə müşayiət olunduğunu söyləyib. Ermənilərin müxtəlif vaxtlarda azərbaycanlılara qarşı həyata keçirdikləri soyqırımlarının bəşər tarixində ən ağır cinayətlər olduğunu söyləyən F.Əhmədov bu faciələr barədə obyektiv məlumatların bütün dünya ictimaiyyətinə yetərincə çatdırılmasının vacibliyini vurğulayıb.
Tarix İnstitutunun direktoru, AMEA-nın müxbir üzvü Yaqub Mahmudov uydurma erməni soyqırımı iddiası ilə bağlı gerçəkliklər barədə məlumat verib, ermənilərin tarixən müxtəlif imperiyaların alətinə çevrilməsindən danışıb. Alim bildirib ki, aprelin 15-də Avropa Parlamentində qondarma “erməni soyqırımı” ilə əlaqədar qəbul edilmiş qətnamə əslində reallıqdan uzaq, qeyri-ciddi və ikili standartların bariz nümunəsi kimi dəyərləndirilməlidir. Erməni lobbisinin dünyada böyük gücə sahib olması bu sənədin Avropadakı erməni lobbisinin təsiri altında olan, Türkiyəyə və Azərbaycana qarşı qərəzli mövqeləri ilə seçilən dairələrin təsiri və təşviqi ilə qəbul edildiyini deməyə əsas verir. Halbuki BMT Təhlükəsizlik Şurasının Ermənistanın silahlı birləşmələrinin işğal olunmuş Azərbaycan torpaqlarından qeyd-şərtsiz çıxarılması barədə dörd qətnaməsinə Ermənistan indiyədək məhəl qoymur, dünya birliyi isə buna göz yumur.
Y.Mahmudov Tarix İnstitutu tərəfindən erməni saxtakarlıqlarının ifşa edilməsi və əsl həqiqətlərin ortaya qoyulması isqtiqamətində yazılan kitabların və tarixi mövzuda faktlarla zəngin elmi məqalələrin xarici dillərə çevrilərək yayılmasının ermənilərin uydurma “faktlar”a uyğun yaydıqları informasiyalara tutarlı cavab olduğunu vurğulayıb. İnstitutun direktoru soyqırımı tədqiqatlarının, o cümlədən Qarabağ həqiqətlərinin dünya ictimaiyyətinə çatdırılmasında alimlərin qarşısında duran vəzifələrdən danışıb, bu tədqiqatların böyük əhəmiyyətini qeyd edib.
Konfransın ümummilli lider Heydər Əliyevin anadan olmasının ildönümünə həsr edilməsinin dərin rəmzi məna daşıdığını vurğulayan Y.Mahmudov bildirib ki, ermənilərin azərbaycanlılara qarşı törətdikləri soyqırımlarının dərindən öyrənilməsi və bu hadisələrə hüquqi-siyasi qiymətin verilməsi Ulu Öndərin adı ilə bağlıdır.
Prezident Administrasiyasının ictimai-siyasi məsələlər şöbəsinin məsul işçisi, fəlsəfə üzrə fəlsəfə doktoru Vüqar Səlimov ötən yüzillikdə ermənilərin azərbaycanlılara qarşı törətdikləri soyqırımı hadisələrinin təhlil edilməsi və onlara beynəlxalq hüquqi-siyasi qiymət verilməsi istiqamətində bu cür tədbirlərin keçirilməsinin əhəmiyyətini vurğulayıb. O bildirib ki, konfrans həm ümummilli lider Heydər Əliyevin anadan olmasının 92-ci və hakimiyyətə qayıdışının 22-ci ildönümünə, həm də türk dünyası üçün aktual və narahatedici məsələnin müzakirəsinə həsr olunub. Bu iki mövzu bu gün bu konfransda təsadüfi olaraq birləşməyib. Çünki ermənilərin türk-müsəlman dünyasına qarşı həyata keçirdikləri məkrli siyasətin ifşa olunmasında ümummilli lider Heydər Əliyevin böyük xidmətləri var.
Gənclərin Elmi Araşdırmalarına Dəstək İctimai Birliyinin sədri Məmmədəli Babaşlı, “Səs” media qrupunun rəhbəri Bəhruz Quliyev və başqaları Ermənistanın yürütdüyü işğalçılıq siyasətindən, erməni lobbisinin uydurma kampaniyalarından danışıblar. Onlar erməni millətçiləri və havadarlarının son iki əsrdə azərbaycanlılara qarşı məqsədyönlü şəkildə həyata keçirdikləri soyqırımı, etnik təmizləmə və deportasiya siyasəti nəticəsində xalqımızın ağır məşəqqətlərə məruz qaldığını bildiriblər.
Daha sonra “Daşnak-bolşevik birləşmələrinin türk-müsəlman əhalisinə qarşı soyqırımları”, “1917-1920-ci illərdə erməni silahlı dəstələrinin Qafqazın müsəlman əhalisinə qarşı soyqırımları (Böyük Britaniya arxiv materialları əsasında)” və “1918-ci ildə ermənilərin törətdikləri soyqırımı Fövqəladə Tədqiqat Komissiyasının sənədlərində” mövzularında məruzələr dinlənilib.
Plenar iclasdan sonra konfrans işini “Azərbaycana qarşı ermənilərin ərazi iddiaları və erməni terrorizmi”, “Ermənilərin azərbaycanlılara qarşı törətdiyi soyqırımları” bölmələri üzrə davam etdirib.
Bölmənin digər xəbərləri
