ERMƏNİSTAN AZƏRBAYCANLA RƏQABƏT APARMAQ İQTİDARINDA DEYİL
Dağlıq Qarabağın qondarma “prezidenti” Arkadi Qukasyan qanunsuz kriminal rejimin, heç bir beynəlxalq təşkilat tərəfindən tanınmamış kriminal dəstənin başçısıdır. Ona görə, onun dedikləri heç bir əhəmiyyət kəsb etmir. AZƏRTAC xəbər verir ki, bu sözləri Türkiyənin “Cümhuriyyət” qəzetinə verdiyi müsahibədə Prezident İlham Əliyev bildirmişdir. Münaqişənin həlli yollarından danışan Prezident vurğulamışdır ki, Dağlıq Qarabağ beynəlxalq birlik tərəfindən Azərbaycanın tərkib hissəsi kimi tanınır. Dünyada, o cümlədən Azərbaycanda müəyyən təcrübə, dünya praktikası, azlıqların normal yaşaması praktikası var. Azərbaycanda milli azlıqlar çox rahat, sərbəst yaşayırlar, bütün hüquqlardan istifadə edirlər. Avropanın bir neçə ölkəsində muxtariyyət forması var.
Prezident demişdir: “Heç bir təşkilat, ölkə heç vaxt Dağlıq Qarabağı tanımayacaq. Bu gün Azərbaycan siyasi, iqtisadi, hərbi cəhətdən güclənir, daha böyük üstün mövqelərə malikdir. Ermənistan bizimlə rəqabət aparmaq iqtidarında deyil və vaxt keçdikcə bizim gücümüz daha da təsirli olacaqdır. İnanıram ki, biz məsələni ədalətli və beynəlxalq hüquq normalarına uyğun olaraq həll edəcəyik. Azərbaycanın ərazi bütövlüyü, suverenliyi bərpa olunacaqdır”.
Bölmənin digər xəbərləri
