Ermənistanın beynəlxalq ictimaiyyəti aldatma cəhdləri yenə də fiaskoya uğradı - Şərh
Bakı, 17 avqust, AZƏRTAC
Ermənistanın, separatçıların və erməni lobbisinin beynəlxalq ictimaiyyəti aldatma cəhdləri yenə fiaskoya uğradı. Açığı desək, çox həvəslə hazırlaşmışdılar və böyük gözləntiləri vardır. Erməni lobbisinin maliyyə dəstəyi ilə bəzi xarici media qurumlarında Azərbaycanın yaratdığı “blokada” və “soyqırımı” təhlükəsi ilə bağlı yazılar tirajlanırdı. Ermənilər məzlum xalq obrazı yaradaraq, ictimaiyyət və beynəlxalq təşkilatlar üçün rəy formalaşdırmağa çalışdılar. Amma məsələ budur ki, artıq 1990-cı illər deyil. İndi dünyaya informasiyanı, mövcud reallıqları müxtəlif formalarda çatdırmaq və göstərmək imkanları var. Əvvəllər erməni yalanlarını dünyaya çatdırmaq gücümüz və imkanımız olmasa da, indi həm diplomatik, həm də texniki göstəricilərimiz kifayət qədərdir. Azərbaycan regionda baş verən hadisələri izləyəcək texniki qurğulara və eyni zamanda, bu məlumatları çatdıra biləcək gücə sahibdir.
Bu sözləri AZƏRTAC-a açıqlmasında Ana Vətən Partiyası sədrinin müavini, politoloq Yalçın Hacızadə söyləyib.
O qeyd edib ki, Ermənistan 1990-cı illərin əvvəlində də bu “taktikadan” istifadə edərək “aclıq çəkdiyini”, aclığa görə “soyqırımı” təhlükəsi ilə “üzləşdiyini” iddia edirdi. Həmin zaman da Qərb mediasında bu barədə böyük kampaniya aparılırdı. Avropa İttifaqı(Aİ) da Ermənistana təcili yardım etməyə çalışırdı. Ermənistanın Xocalıda soyqırımı törətməsindən, Şuşanı, Laçını və digər yerləri işğal və minlərlə insanları qətl etməsindən, yüz minlərlə sakinin öz yerlərindən məcburi köçürülmələrindən isə danışılmırdı. Sanki Azərbaycan işğala məruz qaldığına görə günahkar idi. Heç kim maraqlanmırdı ki, “aclıqdan yox olmaq təhlükəsi” yaşayan bir dövlət necə olur da qonşu ölkəyə hücum edir, onun torpaqlarını işğal edir. Bütün bunları görməzdən gələn Avropa İttifaqı, Rusiya, İran və bəzi ölkələr Ermənistana yardım edirdi. Silah, ərzaq və elektrik enerjisi və s. dəstəyi alan Ermənistan Azərbaycanın 20 faizə qədər torpaqlarını işğal edərək, 30 ilə yaxın “sülh danışıqları” imitasiyası yaratdı. BMT-nin işğalı pisləyən və ermənilərin Azərbaycan torpaqlarından çıxmasını tələb edən dörd qətnaməsi Ermənistan tərəfindən icra edilmədi. Eyni zamanda, beynəlxalq təşkilatlar və aktorlar da Ermənistana qarşı sanksiya və digər təzyiqlər göstərərək qətnamələrin icrasını tələb etmirdilər.
“Azərbaycan beynəlxalq hüququn, BMT Nizamnaməsinin verdiyi imkanlardan istifadə edərək 2020-ci ildə 44 günlük Vətən müharibəsi ilə işğal altında olan torpaqlarını azad etdi. Bütün bunlar da onu göstərir ki, ədalət, beynəlxalq hüquq güclə təmin olunur. Bu gün regionda Azərbaycan siyasi, iqtisadi və hərbi gücə malikdir. Azərbaycan dövləti və xalqı bütün dünyaya sübut etdi ki, ərazisində separatizmin davam etməsinə imkan verməyəcək. Dövlətimiz bütün bu imkanlara malik olmasına baxmayaraq, regionda sülhün yaranmasında, çoxillik münaqişənin bitməsində maraqlıdır. Ona görə sülh danışıqlarını davam etdirir və ərazisində yaşayan erməni əsilli şəxslərin reinteqrasiyasına çalışır. Ermənistanın “humanitar” şousunun əksinə olaraq, erməni əsilli şəxslərin ehtiyaclarını təmin etməyə hazır olduğunu bildirir. Amma təəssüflər olsun ki, qarşı tərəf yenə yalan və saxta ittihamlarla çıxış edərək ölkəmizə qarşı beynəlxalq təzyiq formalaşdırmağa çalışır. Ərazimizdə separatizmin davam etməsində maraqlı olan Fransa, Rusiya və İranın dəstəyi ilə ermənilər yenidən təşkilatlanaraq, münaqişəni alovlandırmağa nail olmaq istəyirlər. Amma anlamırlar ki, daha hay-küy salmaqla reallığı dəyişə, diplomatiyanı və hərbi gücü üstələyə bilməzlər. Laçın dövlət sərhədindən buraxılış məntəqəsi qurmaq, orada keçid rejimi müəyyən etmək və tənzimləmək Azərbaycanın müstəsna hüququdur. Buna görə də dövlətimiz kimdənsə icazə almayaraq tədbirlər görməyə davam edir. Belə hallar ölkəmizin “sərhəd keçid rejimini” tənzimləyən daxili qanunvericiliyi ilə təmin edilir. Ona görə Azərbaycanın Ermənistandan gələn yüklərin və nəqliyyat vasitələrinin haradan keçməsinə icazə verməsini kimləsə müzakirə etmək fikri yoxdur. Əgər vəziyyət həqiqətən Ermənistanın bildirdiyi kimi “təhlükəli” həddədirsə, o zaman alternativ yoldan imtina etməməlidirlər”,-deyə politoloq bildirib.
Y.Hacızadə əlavə edib ki, Ermənistanın BMT Təhlükəsizlik Şurasının müzakirəsinə çıxardığı “məsələyə” görə dəstək ala bilməməsi Azərbaycan dövlətinin, diplomatiyasının və hərbi gücünün nəticəsidir. Azərbaycan hansısa dövlətin və beynəlxalq təşkilatın bəyanatından və qərarından asılı olmayaraq öz ərazisində separatizmin kökün kəsmək, ərazi bütövlüyünü təmin etmək gücündədir və bu istiqamətdə qarşısına qoyduğu məqsədə çatacaq.
Ermənistanın belə ziqzaqvari siyasi gedişi mümkün sülh variantlarını tükəndirməyə aparır. Ermənilər oturduğu budağı yenə baltalamaqla məşğuldurlar. Ermənistanın “Qarabağ Ermənistandır” və ya “yeni müharibə, yeni torpaqlar” iddiasının nəticələrini tez unutması “Dəmir yumruğun” yenidən hərəkətə keçməsi ilə nəticələnə bilər.
Bölmənin digər xəbərləri
