Ermənistanın beynəlxalq konvensiyaları kobud şəkildə pozmasının səbəbi indiyədək ona sanksiyaların tətbiq olunmamasıdır
Bakı, 11 oktyabr, AZƏRTAC
Ermənistanın Gəncəni raket atəşinə tutması həm də onu göstərir ki, işğalçı ölkə əvvəlki illərdə olduğu kimi, dünya ictimaiyyətinin çağırışlarını yenə də heçə sayır, bütün beynəlxalq konvensiyaları kobud şəkildə pozmaqda davam edir. Bunun tək səbəbi Ermənistanın indiyədək cəzasız qalması və işğalçı ölkəyə qarşı hər hansı beynəlxalq sanksiyanın tətbiq olunmamasıdır.
Bunu Milli Məclisin deputatı Tamam Cəfərova AZƏRTAC-a açıqlamasında deyib.
Deputat bildirib ki, Ermənistan ordusu humanitar atəşkəs rejiminə qəti şəkildə riayət etmir, cəbhə bölgəsində hərbi əməliyyatları davam etdirməyə çalışır, Azərbaycanın Gəncə, Mingəçevir, Tərtər, Ağdam və digər yaşayış məntəqələrini, mülki əhalini intensiv raket atəşinə tutmaqda davam edir. Ötən gecə Azərbaycanın ikinci böyük şəhəri 500 mindən çox əhalisi olan, cəbhə xəttindən 80 kilometr məsafədə yerləşən Gəncənin Ermənistanın hərbi-siyasi rəhbərliyinin əmri ilə raket atəşinə tutulması işğalçı dövlətin faşist və təcavüzkar xislətini bir daha sübut edir. Ermənistanın bu barbar və vəhşi hücumu nəticəsində 3 yaşayış binası dağılıb, 9 mülki şəxs həlak olub və 34 nəfər yaralanıb. Ölənlər arasında uşaq və qadınlar da var. Ermənistanın bu cinayəti dinc və günahsız azərbaycanlılara qarşı törədilən və Xocalıdan sonra növbəti soyqırımı aktıdır. Bu, müharibə cinayətidir və mülki insanlara qarşı soyqırımıdır. Atəşkəsin elan olunmasından sonra Ermənistanın Azərbaycanın dinc əhalisinə qarşı açıq hücum etməsi və onlarla insanı öldürməsi, yaralaması tarixdə görünməmiş alçaqlıq və cinayətdir. Ermənistan bu cinayət əməli ilə bir daha sübut etdi ki, əldə olunan razılaşmaya, imzaladığı sənədə o heç zaman əməl etməyib. Nə qədər ki, beynəlxalq ictimaiyyətdə hələ də ikili standartlar davam edir, bəzi ermənipərəst dövlətlər Ermənistanı açıqca dəstəkləyir, bu cinayətlər davam edəcək. Necə ki, Azərbaycana qarşı faktiki olaraq 1990-cı illərdən başlayan soyqırımı siyasəti bu gün də davam edir. Dünya beynəlxalq hüquqa, xüsusilə humanitar hüquqa, insani dəyərlərə hörmət edən dövlətləri Ermənistanın bütün dünya qarşısında bu qədər açıq və birmənalı şəkildə müharibə cinayəti törətməsinə laqeyd qalmamalıdır.
“Dünya ictimaiyyətini, xüsusilə BMT, ATƏT və digər beynəlxalq təşkilatları çoxlu sayda günahsız uşaq və qadını qətlə yetirən Ermənistana qarşı ciddi addımlar atmağa, təcavüzkarı dayandırmağa və bu vəhşiliyi və vandalizm aktını qəti şəkildə pisləməyə çağırırıq”, - deyə Tamam Cəfərova qeyd edib.
Bölmənin digər xəbərləri
