Ermənistanın həyata keçirdiyi siyasət dünya ictimaiyyətini Azərbaycana qarşı qaldırmaqdan ibarətdir
Bakı, 17 avqust, AZƏRTAC
Ermənistanın həyata keçirdiyi siyasət Azərbaycanı ləkələmək, saxta arqumentasiya formalaşdırmaq və dünya ictimaiyyətini ölkəmizə qarşı qaldırmaqdan ibarətdir. Lakin Birləşmiş Millətlər Təşkilatının Təhlükəsizlik Şurasında (BMT TŞ) Ermənistanın qaldırdığı məsələnin müzakirə olunması birbaşa olaraq ölkəmizə qarşı aparılan çirkin kampaniyanın göstəricisidir. Amma ermənilər unudurlar ki, nə Azərbaycan dövləti, nə də xalqı 1988-ci ildəki deyil. Eyni zamanda, beynəlxalq ictimaiyyəti də ölkəmizə qarşı yönəlmək mümkün olmayacaq. Digər tərəfdən saxta blokada, soyqırımı, etnik təmizləmə kimi ifadələrin səsləndirilməsi də həqiqətə uyğun deyil.
Bu sözləri AZƏRTAC-a açıqlamasında Sosial Tədqiqatlar Mərkəzinin (STM) sektor müdiri, politoloq İlyas Hüseynov söyləyib.
Politoloqun sözlərinə görə, Ermənistanın irəli sürdüyü yalançı təbliğatın genişlənməsi təəssüf ki, bir sıra korrupsiyaya bulaşmış şəxsləri öz ətrafında toplaya bilib. Buna baxmayaraq, Azərbaycanın yürütdüyü siyasət Qarabağda yaşayan ermənilərin sosial, iqtisadi, humanitar və təhlükəsizlik hüquqlarının qorunması ilə bağlıdır. Bu barədə də dövlətimiz dəfələrlə həm erməni cəmiyyətinə, həm də dünya ictimaiyyətinə məlumatlar verib. Lakin bunun əksinə olaraq Ermənistan reinteqrasiya prosesinə qarşı çıxır, Azərbaycanın daxili işlərinə qarışır, separatçı rejimi dövlət büdcəsindən maliyyələşdirir. Bu da beynəlxalq hüququn fundamental norma və prinsiplərinin pozulmasıdır.
“Dünya ictimaiyyəti və beynəlxalq birlik 1993-cü ildə BMT-nin qəbul etdiyi dörd məlum qətnamə ilə bağlı mövqeyini ifadə edib. Bu qətnamələrdə də göstərildiyi kimi Ermənistan silahlı qüvvələri tam, qeyd-şərtsiz Azərbaycan torpaqlarından çıxarılmalı idi. Lakin təəssüflər olsun ki, bu, hələ də baş verməyib. Baxmayaq ki, 44 günlük Vətən müharibəsindən sonra Ermənistan kapitulyasiya aktına imza atmışdı və üzərinə öhdəliklər götürmüşdü.
2020-ci il 10 noyabr tarixli üçtərəfli Bəyanatın 4-cü bəndində göstərilir ki, regionda sülhməramlıların yerləşdirilməsi ilə paralel olaraq erməni silahlıları Azərbaycan ərazilərini tərk etməlidirlər. BMT TŞ-də bu mövzunun müzakirəyə çıxarılması həm də ölkəmizə o hüququ verir ki, Azərbaycan sülhə məcburetmə əməliyyatını həyata keçirə bilər. BMT Nizamnaməsinin 51-ci maddəsi özünümüdafiə cəhətdən Azərbaycana bu legitim hüququ verir. Ermənistan nə qədər beynəlxalq müstəvidə ölkəmizə qarşı kampaniyalar aparacaqsa, sülh müqaviləsinin imzalanmasından boyun qaçıracaqsa, Azərbaycanın şərtləri daha da kəsin və sərt olacaq. Qarşıdakı vaxtlarda Rusiya sülhməramalı kontingentinin yerləşdirildiyi Xankəndi və ətraf bölgələrdə Azərbaycan öz legitim hüquqlarının təminatı və icrası istiqamətində müvafiq addımlar atacaq. Qeyd etdiyimiz kimi, beynəlxalq hüquq və ədalət bu imkanı ölkəmiz üçün tanıyır”, - deyə o bildirib.
Bölmənin digər xəbərləri
