ETSN-in əməkdaşları 8 vələs ağacının kəsildiyini aşkar etmişlər
Bakı, 15 mart (AZƏRTAC). Ekologiya və Təbii Sərvətlər Nazirliyinə (ETSN) Astara rayonu Şümrüd kənd sakini Seyfulla Əhədovdan şikayət məktubu daxil olmuşdur. Məktubda Hirkan Milli Parkının Təngərüd meşəbəyliyinin 6 saylı dolayının ərazisində ağacların qırılması və 0,5 hektar torpaq sahəsinin Məhərrəməli Xudaquliyev tərəfindən zəbt edilməsi ilə bağlı məlumat verilmişdir.
ETSN-in mətbuat xidmətindən AZƏRTAC-a bildirilmişdir ki, göstərilən fakt üzrə nazirliyin əməkdaşları yerində araşdırma aparmış, diametri 12-24 sm olan 8 vələs ağacının, həmçinin diametri 48 sm olan fısdıq ağacının doğranılaraq aparıldığı müəyyən edilmişdir.
Bundan başqa, Hirkan Milli Parkının Təngərüd meşəbəyliyinin 3 saylı dolayının ərazisində də ağacların kəsilərək aparıldığı, eyni zamanda xırdabuynuzlu mal-qaranın sahibsiz otladığı aşkar edilmişdir.
Hər iki faktla bağlı müvafiq sənədlər tərtib edilmiş, cavabdeh mühafizə yegerləri - İltifat Qasımov və Vidadi Lələyev barəsində inzibati tənbeh tədbirləri görülmüş, təbiətə dəymiş ziyan qanun pozucuları tərəfindən ödənilmişdir.
Bölmənin digər xəbərləri
