ETSN monitorinqin nəticələrini açıqlamışdır
Bakı, 12 may (AZƏRTAC). Ekologiya və Təbii Sərvətlər Nazirliyinin (ETSN) Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların qollarının çirklənmə səviyyəsini öyrənmək məqsədi ilə may ayının birinci ongünlüyü üçün monitorinq keçirmişdir.
Nazirliyin mətbuat xidmətindən AZƏRTAC-a bildirmişlər ki, Kür çayında su sərfi aprel ayının üçüncü ongünlüyünə nisbətən 158 kubmetr/saniyə artaraq saniyədə 995 kubmetr təşkil etmişdir. Gürcüstan və Ermənistan ərazilərindən təmizlənmədən axıdılan məişət tullantıları və sənaye müəssisələrinin çirkab sularının təsiri nəticəsində çayda biogen maddələrin miqdarı normadan dəfələrlə artıq olmuşdur. Belə ki, Şıxlı-2, Ağstafaçay məntəqələrində suyun əsas çirkləndiricilərindən olan fenollar və mis birləşmələri yol verilən qatılıq həddini keçmişdir.
Araz çayının Horadiz, Birinci Şahsevən, Bəhramtəpə məntəqələrində də normadan artıq zərərli maddələr qeydə alınmışdır.
Suyun oksigen rejimi bütün məntəqələrdə sanitar norma daxilində dəyişmişdir.
Bölmənin digər xəbərləri
