Fərid Qayıbov: Dövlətimizin uğurlu siyasəti nəticəsində ölkəmiz idman mərkəzlərindən birinə çevrilib
Quba, 3 may, AZƏRTAC
Dövlətimizin uğurlu siyasəti nəticəsində ölkəmiz idman mərkəzlərindən birinə çevrilib.
AZƏRTAC xəbər verir ki, bu sözləri gənclər və idman naziri Fərid Qayıbov Qubada təşkil edilən yeniyetmələr arasında Avropa Kubokunun açılış mərasimindən sonra jurnalistlərə açıqlamasında deyib.
Nazir Azərbaycanın bu həftə üç beynəlxalq yarışa ev sahibliyi etdiyini xatırladıb: "Bunlardan biri də Qubada keçirilən yeniyetmə cüdoçular arasında Avropa Kubokudur. İdman yarışlarının sayının çox olması sevindirici məqamdır. Artıq ölkəmizdə baş tutan turnirlərə gələn idmançı sayında da ildən-ilə artım olur. Bölgələrimizin beynəlxalq yarışları qəbul etməsi müsbət məqamdır".
F.Qayıbov növbəti mövsüm Azərbaycanı avrokuboklarda təmsil edəcək futbol klublarımıza da uğurlar arzulayıb: "İnanıram ki, komandalarımız yeni tarix yazacaq. Biz təmsilçilərimizə güvənirik".
Qeyd edək ki, mayın 4-də başa çatacaq yarışda Azərbaycanı 141 idmançı (100 oğlan, 41 qız) təmsil edir.
Bölmənin digər xəbərləri
