Fevralda Dövlət Yanğın Nəzarəti Xidməti təbliğat xarakterli 764 tədbir keçirib
Bakı, 1 mart, AZƏRTAC
Fövqəladə Hallar Nazirliyinin (FHN) Dövlət Yanğın Nəzarəti Xidməti tərəfindən fevralda keçirilən “Yanğın təhlükəsizliyi ayı” ərzində ərazi və regional Dövlət Yanğın Nəzarəti idarələrinin şəxsi heyətinin iştirakı ilə 764 təbliğat xarakterli tədbir keçirilib. Bu tədbirlərdə 51 mindən artıq şəxs yanğın təhlükəsizliyi ilə bağlı maarifləndirilib.
FHN-dən AZƏRTAC-a bildiriblər ki, 70 ünvanda yolun hərəkət hissəsinin bağlanmasına səbəb olan maneələr demontaj edilib, 98 ünvanda yanğına qarşı su təchizatı qurğusunun nasazlığı aşkarlanıb. Yaşayış komplekslərinin yerləşdiyi 74 ünvanda şərti “Yanğın” həyəcan siqnalı verilərək əraziyə Fövqəladə Hallar Nazirliyinin Dövlət Yanğından Mühafizə Xidmətinin yanğın texnikaları cəlb edilib, mövcud əməliyyat şəraiti qiymətləndirilib.
Aşkarlanmış çatışmazlıqların qısa müddətdə aradan qaldırılması məqsədilə aidiyyəti üzrə məktublar ünvanlanıb.
Bu istiqamətdəki tədbirlər davam etdirilir.
Bölmənin digər xəbərləri
