FHN-dən Qusarda ölümlə nəticələnən yanğınla bağlı açıqlama
Qusar, 14 yanvar, Elxan Yusifli, AZƏRTAC
Fövqəladə Hallar Nazirliyi Qusarda iki nəfərin ölümü ilə nəticələnən yanğın barəsində məlumat yayıb.
AZƏRTAC-ın bölgə müxbiri xəbər verir ki, məlumatda yanğının Qusar rayonunun Yeni Həyat kəndində ümumi sahəsi 280 kvadratmetr olan ikimərtəbəli evdə baş verdiyi bildirilib. Evin birinci mərtəbəsində 2 otağın və eyvanın, ikinci mərtəbəsində isə 2 otağın və dam örtüyünün yanar konstruksiyaları yanıb.
Yanğın yerinin kəşfiyyatı zamanı biri azyaşlı olmaqla 2 nəfərin yanmış meyiti yanğınsöndürənlər tərəfindən aşkar edilərək aidiyyəti üzrə təhvil verilib. Evin qalan hissəsi yanğından mühafizə olunub. Yanğın yanğından mühafizə bölmələri tərəfindən söndürülüb.
Hadisə ilə əlaqədar müvafiq qurumlar tərəfindən təhqiqat aparılır.
Bölmənin digər xəbərləri
