Avqustun 15-də “İmproteks Motors” şirkətinin mağazasında Azərbaycanda ilk dəfə olaraq “Formula-1” avtomobil yarışları üzrə dünya çempionatının reklam bolidi (avtomobili) nümayiş olunmuşdur.

AZƏRTAC-ın müxbiri xəbər verir ki, tədbiri “Formula-1” yarışlarının Bakıdakı həvəskarları klubu təşkil etmişdir. Klub on ildən artıqdır ki, fəaliyyət göstərir və 1999-cu ildə rəsmən qeydiyyatdan keçmişdir. Avtomobilin təqdimat mərasimində çıxış edən klubun üzvləri dedilər ki, ”Formula-1” yarışları bolidinin Uilyams- BMV (İngiltərə-Almaniya) komandası tərəfindən Azərbaycana gətirilməsi reklam xarakteri daşıyır və məsələni həll etmək üçün bir aydan çox danışıqlar aparılmışdır. Bolidin köhnə nümunə olduğu, lakin 1997-ci ildə bu maşın növündə Kanada idmançısının dünya çempionu adını qazanması tədbir iştirakçılarının nəzərinə çatdırıldı.

Tədbirin məqsədi idmanın texniki növlərinin Azərbaycanda yenidən geniş yayılmasına təkan verməkdir. Qardaş Türkiyədə 2005-ci ildə “Formula-1” yarışlarının keçiriləcəyi xəbəri tədbirin iştirakçılarında böyük maraq doğurdu. Sonda geniş ekranda Macarıstandan canlı yayımla “Formula-1” yarışlarına baxış oldu.