FRANSADA YENİ XƏSTƏLİK EPİDEMİYASI
AZƏRTAC-ın xüsusi müxbiri xəbər verir ki, mənşəyi məlum olmayan mikrobların ağ ciyərdə törətdiyi fəsadlar nəticəsində noyabr ayının ikinci yarısından bu günə qədər Pa-de-Qaluada bu xəstəliyə tutulmuş 69 nəfərdən 7-si, Lans rayonunda isə 67 nəfərdən 8-i artıq dünyasını dəyişmişdir. Digər xəstələr isə həkimlərin ciddi nəzarəti altındadır.
Fransanın ən nüfuzlu və müasir avadanlıqlarla təchiz edilmiş elmi tədqiqat laboratoriyalarında ciddi araşdırmalar aparılır. İlkin fərziyyələrə görə ağ ciyərin iltihabına səbəb olan bu xəstəliyi nəhəng neft-kimya zavodlarında havanı təmizləmək və sərinləşdirmək üçün quraşdırılmış iri kondisionerlərin uzun müddət təmizlənməməsi nəticəsində süzgəclərində qalan çirkli sularda əmələ gələn mikroblar törədir. Güman edilir ki, bu zavodlarda çalışan işçilərin nəfəs borusu ilə ağ ciyərlərə daxil olan mikroblar ciddi fəsadlar törədir və bir müddətdən sonra insanın ölümünə səbəb olur.
Alimlərin ciddi səylərinə baxmayaraq, geniş yayılmaqda olan epidemiyanın qarşısını almaq və xəstəliyi əmələ gətirən amilləri üzə çıxarmaq hələlik mümkün olmamışdır.
Mütəxəssislər bu sahədə axtarışlarını davam etdirirlər.
Bölmənin digər xəbərləri
