Fransua Bayru V Respublikanın ən qeyri-populyar baş naziridir
Paris, 19 iyun, AZƏRTAC
Fransa V Respublikasının ən qeyri-populyar Baş naziri Fransua Bayru olub.
AZƏRTAC xəbər verir ki, “Ipsos-Cesi” şirkətinin “La Tribune Dimanche” nəşri üçün keçirdiyi sorğunun nəticələrinə əsasən, Fransua Bayru cəmi 17 faiz müsbət rəy toplayaraq, V Respublika tarixində ən az dəstək qazanan Baş nazir statusunu alıb.
Cəmi altı aydır vəzifədə olan Bayrunun populyarlıq göstəricisi may ayı ilə müqayisədə 3 faiz azalaraq enişini davam etdirir. Sorğunun nəticələri göstərir ki, bu azalma daha çox Renaissance, Modem və Horizons partiyalarının tərəfdarları arasında müşahidə olunur.
Prezident Emmanuel Makron da oxşar aqibətlə üzləşib. Onun populyarlıq reytinqi may ayına nisbətən 5 faiz geriləyib və hazırda cəmi 21 faiz müsbət rəy ilə çıxış edir. Bu göstərici Makronun 2018-ci ilin qışında, “Sarı jiletlilər” hərəkatı zamanı qeydə alınan 20 faizlik minimum göstəricisinə yaxınlaşıb. Prezidentin dəstəyi də əsasən hakim koalisiyanın — Renaissance, Modem və Horizons tərəfdarları arasında ciddi şəkildə azalıb.
“Ipsos”un baş direktor müavini Bris Təntüerye bu vəziyyəti belə şərh edib: “Son hadisələr dövlət orqanlarına qarşı cəmiyyətin narazılığını və qəzəbini daha da artırır”.
Eyni sorğuya görə, daxili işlər naziri Bruno Retaillo 36 faiz, ədliyyə naziri Jerald Darmanin isə 34 faiz müsbət rəy toplayaraq, hökumət daxilində ən populyar siyasətçilər olaraq qalırlar.
Bölmənin digər xəbərləri
