“Fukuşima-1” AES-in sabiq rəhbərlərinin bəraət hökmü təsdiqlənib
Bakı, 18 yanvar, AZƏRTAC
Yaponiya apellyasiya məhkəməsi 2011-ci ilin martında “Fukuşima-1” AES-də baş vermiş qəzanın qarşısını ala bilməməkdə və səhlənkarlıqda ittiham olunan Tokyo Electric Power (TEPCO) enerji kompaniyasının üç keçmiş rəhbərini təqsirli bilməyib.
AZƏRTAC Yaponiya mediasına istinadla xəbər verir ki, bu barədə məhkəmə instansiyasının çərşənbə günü yayılan qərarında deyilir.
İş üzrə cavabdehlər kompaniyanın idarə heyətinin sabiq sədri və iki vitse-prezidenti idi. Apellyasiya məhkəməsi hesab edib ki, təqsirləndirilən şəxslər AES-in yerləşdiyi rayonda "10 metrdən çox hündürlüyü olan sunaminın meydana gəlməsi ehtimalını qabaqcadan görə bilməzdilər". Beləliklə, 2019-cu ildə Tokio dairə məhkəməsi tərəfindən çıxarılmış bəraət hökmü təsdiqlənib.
TEPCO-nun üç sabiq rəhbərinin məhkəməsi 2017-ci ildə başlayıb. Obyektin yuxarı rəhbərliyinin hündürlüyü təxminən 15 metr olan sunaminin stansiyanın yaxınlığındakı sahil zolağına düşə biləcəyindən xəbərdar olub-olmadığını aydınlaşdırmaq lazım idi. Sabiq TEPCO rəhbərliyi, həmçinin qəzanın qarşısını almaq üçün lazımi tədbirlər görməməkdə ittiham olunurdu.
“Fukuşima-1” AES-də qəza 2011-ci ilin martında baş verib. Güclü sunami stansiyanın enerji təchizatı və soyutma sistemlərini vurub. Nəticədə üç enerji blokunun reaktorlarında nüvə yanacağı əriyib, 4-cü bloku zədələyən hidrogen partlayışları baş verib. Eyni zamanda, stansiyaya bitişik ərazilərin çirklənməsinə səbəb olan böyük həcmdə radioaktiv maddələr buraxılıb.
Atom elektrik stansiyasının tam sökülməsinin 2050-ci ilədək başa çatdırılması planlaşdırılır.
Bölmənin digər xəbərləri
