Futzal üzrə Azərbaycan millisinin baş məşqçisi: Komandamız çox yaxşı formadadır
Bakı, 1 dekabr, AZƏRTAC
Üç gündür təlim-məşq toplanışlarına başlamışıq. Millinin heyəti əsasən “Araz” komandasının futbolçuları əsasında formalaşdırılıb. Yığmaya cəlb edilən yeni oyunçuların komandanın taktiki sxeminə uyğunlaşmaları üçün ardıcıl məşqlər edirik.
AZƏRTAC xəbər verir ki, bu sözləri futzal üzrə Azərbaycan millisinin baş məşqçisi Joze Alesio Da Silva jurnalistlər üçün təşkil olunan brifinqdə deyib.
O bildirib: “Milliyə 17 nəfər cəlb olunsa da, biz İrana 14 nəfərlə yollanacağıq. Turnirdə iştirak edə bilməyəcək oyunçular təlim-məşq toplanışında bilinəcək. Dubay klubunda çıxış edən Vasorenin fiziki və taktiki göstəriciləri məni qane edir. İranda keçiriləcək turnir maraqlı olacaq. İştirak edəcək komandalar çox güclüdürlər. Rusiya, Qazaxıstan, İran bizim rəqiblərimizdir. Avropa çempionatı öncəsi belə bir turnirdə iştirak etməyimiz çox faydalıdır”.
Milli komandanın kapitanı Rizvan Fərzəliyev isə deyib: “Artıq bir neçə gündür təlim-məşq toplanışındayıq. İranda güclü komandalarla mübarizə aparacağıq. Çalışacağıq ki, əlimizdən gələni edib vətənə yüksək nəticə ilə qayıdaq”.
Brifinqdən sonra futzalçılar baş məşqçinin rəhbərliyi ilə məşqlərinə davam ediblər.
Bölmənin digər xəbərləri
