“Gəncliyimiz gələcəyimizdir” adlı respublika yaradıcılıq müsabiqəsinin qalibləri mükafatlandırılıb
Bakı, 5 iyul, AZƏRTAC
İyulun 5-də Elm və Təhsil Nazirliyi, Azərbaycan Milli Elmlər Akademiyası (AMEA), Xəzər Rayon İcra Hakimiyyəti, Xəzər Rayon Gənclər İdman İdarəsi, Bakı Şəhər Mədəniyyət Baş İdarəsi və Dendrologiya İnstitutunun birgə təşkilatçılığı ilə “Gəncliyimiz gələcəyimizdir” adlı rəsm və əl işlərindən ibarət respublika yaradıcılıq müsabiqəsi keçirilib.
AZƏRTAC xəbər verir ki, müsabiqənin təşkil edilməsində məqsəd Ulu Öndər Heydər Əliyev irsinin təbliği, milli-mənəvi dəyərlərimizin gələcək nəsillərə aşılanması, Azərbaycanın mədəniyyət paytaxtı Şuşanın, Qarabağın çoxəsrlik mədəni-tarixi irsinin daha dərindən mənimsənilməsi, eləcə də Vətən müharibəsində Ordumuzun nümayiş etdirdiyi şücaəti gənc rəssamların gözü ilə cəmiyyətə çatdırmaq olub.
Tədbirdə könüllü yeniyetmələr ən çox 3 əsər təqdim etməklə iştirak ediblər. Seçim zamanı əl işlərinə kənar müdaxilənin olmaması, həmçinin kompozisiyanın motivi və ideyası əsas götürülüb.
Müsabiqədən öncə rəsm əsərlərinə və əl işlərindən ibarət sərgiyə baxış keçirilib.
Tədbirdə çıxış edən AMEA-nın birinci vitse-prezidenti vəzifəsini icra edən, akademik Arif Həşimov bildirib ki, “Heydər Əliyev İli” çərçivəsində keçirilən müsabiqənin əsas məqsədi təməli Ulu Öndər tərəfindən qoyulmuş dövlət gənclər siyasətinin əsasında geniş dünyagörüşünə, milli düşüncəyə malik gənc nəslin yetişdirilməsini, gənclərdə vətənpərvərlik ruhunun gücləndirilməsini və azərbaycançılıq ideologiyasının təbliğini təmin etməkdir.
Akademik Arif Həşimov gənclərin inkişafında, bilik və bacarıqlarının artırılmasında mühüm rol oynayan belə müsabiqələrin təşkilinin ənənəyə çevrilməsini müsbət hal kimi dəyərləndirib. O, sərgidə nümayiş olunan əsərlərin gələcəkdə Azərbaycan mədəniyyəti xəzinəsində öz yerini tutacağına inamını ifadə edib.
AMEA-nın vitse-prezidenti akademik İradə Hüseynova çıxış edərək Ulu Öndər Heydər Əliyevin xalqımızı zamanın mürəkkəb tarixi-siyasi sınaqlarından uğurla çıxararaq müstəqilliyə qovuşdurmuş qüdrətli şəxsiyyət olduğunu bildirib. O, ölkəmizdə gənclərimizlə bağlı dövlət siyasətinin formalaşdırılması və həyata keçirilməsinin məhz Ümummilli Liderin adı ilə bağlı olduğunu vurğulayıb. Ulu Öndərin elm və təhsilin inkişafına böyük qayğı ilə yanaşdığını deyən akademik İradə Hüseynova bu siyasətin Prezident İlham Əliyev tərəfindən uğurla davam etdirildiyini söyləyib. Bildirib ki, Müzəffər Ali Baş Komandan İlham Əliyevin rəhbərliyi ilə torpaqlarımız işğaldan azad edilib, tarixi Qələbə əldə olunub.
Akademik sərgidə təqdim olunan əsərlərin Ümummilli Lider Heydər Əliyevə, Azərbaycanın müstəqillik tarixinə, şanlı Qələbəmizə, eləcə də şəhidlərimizə və qazilərimizə həsr olunduğunu söyləyib.
Tədbirdə AMEA Azad Həmkarlar İttifaqının sədri Habil Qurbanov, Xəzər Rayon Gənclər və İdman İdarəsinin rəisi Vüqar Əliyev, Xəzər Rayon Mərdəkan Mədəniyyət Sarayının direktoru Cavid Şahbazbəyli, AMEA-nın Qadınlar Şurasının sədri Rəna Mirzəzadə, Dendrologiya İnstitutunun baş direktoru vəzifəsini icra edən Minarə Həsənova çıxış edərək sərgidə nümayiş olunan əsərlərin məzmun və xaraktercə düzgün seçildiyini, balaca rəssamların Ulu Öndərin əziz xatirəsinə hədsiz hörmət və ehtiramının hər bir əsərdə ifadə olunduğunu vurğulayıblar.
Daha sonra məktəblilərin hazırladıqları şeir və rəqs nömrələrindən ibarət kompozisiyalar təqdim olunub.
Sonda müsabiqənin Təşkilat Komitəsi qaliblərin adlarını açıqlayıb. İlk üç yerin qalibi diplom və pul mükafatı, digər iştirakçılar isə fəxri fərman və təşəkkürnamələrlə təltif olunublar.
Qeyd edək ki, “Gəncliyimiz gələcəyimizdir” respublika yaradıcılıq müsabiqəsinə Bakı, Gəncə, Qazax, Şəki, Qax, Xaçmaz və Lənkəranda yerləşən orta təhsil müəssisələri və Azərbaycan Dövlət Rəssamlıq Akademiyasından ümumilikdə 300-dək rəsm və əl işləri təqdim olunub.
Bölmənin digər xəbərləri
