Güclü gənclik, güclü Azərbaycan deməkdir
Bakı, 12 avqust, A.Aktar, AZƏRTAC
Azərbaycan xalqı bu günü və sabahı üçün Ulu Öndərimiz Heydər Əliyevə borcludur. Ümummilli Liderimiz həmişə xalqına arxalanır, onun gəncliyinə böyük ümidlər bəsləyirdi. O, dəfələrlə qeyd edirdi ki, ölkəmizin gələcəyi gənclərin əlindədir.
Ulu Öndərin ikinci dəfə siyasi hakimiyyətə gəlişindən sonra gənc nəslə diqqət və qayğı dövlətin ən mühüm fəaliyyət istiqamətlərindən birinə çevrilib. Azərbaycan gənclərinin təşkilatlanması əsas məqsədlərdən biri kimi qarşıya qoyulub. 1994-cü ildə Ulu Öndər tərəfindən yaradılmış Gənclər və İdman Nazirliyi qısa müddətdə dövlət gənclər siyasətinin istiqamətlərini müəyyənləşdirərək uğurla həyata keçirməyə başlayıb.
Bu sözləri AZƏRTAC-a açıqlamasında “İnnovativ İnkişaf” İctimai Birliyinin sədri Taleh Mansurov deyib.
Bildirib ki, Ümummilli Liderin irəli sürdüyü təşəbbüsdən sonra 1996-cı ildən başlayaraq Azərbaycan gənclərinin forumları keçirilib. Bu forumlar Azərbaycanda gənclər hərəkatının vüsət almasına təkan verdi. Ümummilli Lider Heydər Əliyev I Forumdan sonra gənclərlə aparılan işin nəzərəçarpacaq dərəcədə canlandığını nəzərə alaraq 1997-ci ildə imzaladığı Sərəncamla tədbirin keçirildiyi günü - fevralın 2-ni Azərbaycan Gəncləri Günü elan edib. Gənclər və İdman Nazirliyinin yaradılması məhz Ulu Öndərin gənclərə olan münasibətinin tərənnümüdür. O illərdə ölkəmiz böhrandan yenicə çıxırdı. Azərbaycanda iqtisadi vəziyyət çox ağır idi. Məhz həmin vaxt ölkəmizdə islahatlara start verildi. Ulu Öndərin qərarı Azərbaycanda gənclər üçün yeni imkanlar açdı, yeni şərait yaratdı. Sonra da müvafiq qərarlar qəbul edildi, dövlət gənclər siyasəti haqqında Fərman imzalandı. Sonrakı dövrdə belə ki, 2003-cü ildən bu günə qədər dörd Dövlət Proqramı qəbul edilib, bölgələrdə 40-a yaxın Gənclər Mərkəzi, onlarla Olimpiya İdman Mərkəzi yaradılıb. Çox böyük fəxr və qürur hissi ilə deyə bilərik ki, Azərbaycan gəncləri bu gün müstəqillik dövründə yaşayırlar.
“Ulu Öndər Heydər Əliyevin gəncliyə və gənclərə etimadı bu gün artıq təsdiqini tapıb. Ölkəmizdə gənclər siyasəti yeni mərhələsini yaşayır. Prezident İlham Əliyev Ulu Öndərin gənclər siyasətinə sadiqliyini öz qərarları ilə təsdiq edir. Vətən müharibəsi zamanı döyüş meydanında düşmənin hər cür təxribatına inamla cavab verən Azərbaycan əsgərinin, zabitlərinin əksəriyyəti son 20 ildə formalaşan gənclərdir. Bu gün hər bir vətənpərvər azərbaycanlı haqlı olaraq fəxr edir ki, o, müstəqil respublikanın vətəndaşıdır.
Azərbaycanın hərtərəfli inkişafında gənclərimizin çox böyük rolu vardır. Ölkəmizin gəncləri müxtəlif sahələrdə uğurla fəaliyyət göstərirlər və ölkəmizin ümumi inkişafına böyük töhfə verirlər. Gənclər siyasətinin ən uğurlu layihələrindən biri olan ölkənin gələcəyini quracaq şəxslərdən biri olmaq imkanını qazandıran “Yüksəliş” müsabiqəsini xüsusi qeyd etməliyəm. Bu günə qədər həmin müsabiqənin iki mövsümü başa çatıb. İştirakçısı olduğum “Yüksəliş” müsabiqəsi həddindən artıq çətin, genişşaxəli və fundamental müsabiqədir. Son iki ildə rəhbər vəzifələrdə məhz bu müsabiqənin qaliblərinin iştirakçılarının olduğunun müşahidə edirik. İdman sahəsində gənclərin beynəlxalq yarışlarda 800-dən çox medal qazanması, onlardan 300-ə yaxını qızıl medal olması böyük nailiyyətdir. Bu, son illərdə aparılan gənclər siyasətinin nəticəsidir. Bu il mini futbol üzrə Azərbaycan yığması Avropa çempionu olmasında böyük nailiyyətlərdəndir.
Azərbaycan gənci mərddir. Bu gün hər bir Azərbaycan gənci Ümummilli Lider Heydər Əliyevin ideyalarını öz fəaliyyətində rəhbər tutmalı, gəncliyimizin Lideri olan Prezident İlham Əliyevin rəhbərliyi ilə Azərbaycanın müstəqilliyinin əbədi yaşaması üçün hər kəs yumruğunu bir hədəfə vurmalıdır. Bu gün Azərbaycan gəncləri Prezident İlham Əliyevin uğurlu daxili və xarici siyasətini dəstəkləyirlər.
Güclü gənclik, güclü Azərbaycan deməkdir. Var olduqları hər sahədə özünə və bəşəriyyətə fayda qazandıran, dünyamızı rəngarəng edən bütün gənclərin günü mübarək!”, - deyə T.Mansurov qeyd edib.
Bölmənin digər xəbərləri
