Günay Əfəndiyeva: Azərbaycanın uğurlu sədrliyi ilə Qoşulmama Hərəkatının fəaliyyətinə mühüm töhfələr verildi
Bakı, 7 iyul, AZƏRTAC
Azərbaycanın uğurlu sədrliyi ilə son illərdə Qoşulmama Hərəkatının fəaliyyətinə mühüm töhfələr verildi. Azərbaycan Respublikasının Prezidenti İlham Əliyevin rəhbərliyi ilə böyük humanitar missiyalar həyata keçirildi, həmrəyliyi təşviq edən və davamlı sülhə aparan mühüm addımlar atıldı.
AZƏRTAC xəbər verir ki, bu sözləri Beynəlxalq Türk Mədəniyyəti və İrsi Fondunun prezidenti Günay Əfəndiyeva Bakıda Azərbaycan Respublikasının sədrliyi ilə keçirilən Qoşulmama Hərəkatının Koordinasiya Bürosunun nazirlər görüşündə söyləyib.
Günay Əfəndiyeva keçən müddət ərzində baş verən dəyişiklikləri, pandemiya dövrünün təsirlərini qeyd edərək deyib: “Bu sınaq bizlərə bir-birimizə əhəmiyyət, qiymət verməyi öyrətdi. Dəyərlərimizin yenidən nəzərdən keçirilməsinin şahidi olduq”.
Fondun prezidenti Qoşulmama Hərəkatının yarandığı gündən etibarən birlik, müstəqillik və tərəfsizliyin simvolu olduğunu nəzərə çatdıraraq, bildirib ki, hərəkat öz suverenliyini qoruyub saxlamağa və böyük güc bloklarının təsirindən azad olaraq, öz istiqamətlərini təyin etməyə çalışan xalqların səslərini birləşdirdi. Yer üzündəki hər bir xalqın səsi önəmlidir.
G.Əfəndiyeva müasir dövrdə tolerant dəyərlərlə birgə yaşamağa, mədəniyyətlərarası dialoqu daha da genişləndirməyə ehtiyacın artmasına diqqəti çəkib. Mədəniyyətlərin dialoqunu xalqlar, ölkələr, insanlar arasında ünsiyyət kimi qiymətləndirib. Bildirib ki, rəhbərlik etdiyi türk xalqlarının zəngin mədəniyyətini öyrənən və təbliğ edən Beynəlxalq Türk Mədəniyyəti və İrsi Fondunun əsas missiyası sırasında müxtəlif sivilizasiyaları bir araya gətirmək və xalqlar arasında mədəni körpü rolunu oynamaq mühüm yer alır.
“Fond türk və digər dünya ölkələri arasında mədəni mübadilələrin intensivləşdirilməsi məqsədilə xarici ölkələrlə əməkdaşlıq edərək müxtəlif qitələrdə layihələr həyata keçirir. Məqsədimiz ölkələrin milli, maddi və mənəvi dəyərlərinə həssas münasibət aşılamaq, ümumbəşəri sərvətləri qoruyub saxlamaqdır. Fərqliliklərimizə bələd olmaqla, oxşar cəhətlərimizi kəşf etməklə, tanımaqla və tanıtmaqla daha da yaxınlaşmaqdır”, - deyə Fondun prezidenti vurğulayıb.
Bəşəriyyətin üzləşdiyi qlobal təhdidlərə, qeyri-insani davranışlara və vandalizm aktlarına toxunan G. Əfəndiyeva Azərbaycanın işğaldan azad olunmuş Qarabağ ərazisindəki dəhşətli faktları, tarixi incilərin kütləvi şəkildə məhv edilməsini, dini abidələrin, qəbiristanlıqların təhqir edilməsini, kitabxanaların, qiymətli arxivlərin, əlyazmaların yandırılmasını qınayıb.
“Vəhşiliklər qarşısında susduqca belə halların sayı daha da artır. Biz bu təhlükə, bu çağırış qarşısında birliyimizi, dəyanətimizi ifadə etməliyik. Gələcəkdə belə halların qarşısını almaq üçün ədalətli mövqeyimizi açıq şəkildə nümayiş etdirməli, həmrəyliyimizi gücləndirməliyik”, - deyə o, tədbir iştirakçılarına müraciət edib.
Sonda Fondun prezidenti bildirib ki, rəhbərlik etdiyi təşkilat Qoşulmama Hərəkatına üzv dövlətlər arasında daha güclü əlaqələrin qurulmasına, qarşılıqlı anlaşmanın və mədəni dialoqun təşviqinə töhfə verə bilər. “Bu potensialdan birlikdə istifadə etməklə biz ümumi inkişafa və tərəqqiyə nail ola bilərik”, - deyə Günay Əfəndiyeva qeyd edib.
Bölmənin digər xəbərləri
