Gürcüstan qonşu ölkələrlə əlaqələrin genişləndirilməsi istiqamətində mühüm addımlar atıb
Tbilisi, 27 dekabr, AZƏRTAC
Gürcüstan dövləti 2018-ci ildə qonşu ölkələrlə siyasi, iqtisadi və mədəni əlaqələrin genişləndirilməsi istiqamətində əhəmiyyətli addımlar atıb.
Qonşu ölkələrlə əməkdaşlıq daha da dərinləşib və bu əməkdaşlıq bəzi ölkələrlə strateji tərəfdaşlıq səviyyəsinə yüksəlib.
AZƏRTAC xəbər verir ki, bu barədə Gürcüstanın xarici işlər naziri David Zalkalianinin 2018-ci ilin yekunları ilə bağlı təqdim etdiyi hesabatda bildirilir.
Məlumatda qeyd edilir ki, 2018-ci ildə Türkiyə və Azərbaycanla strateji tərəfdaşlıq əlaqələrinin dərinləşdirilməsi davam etdirilib. Hər iki ölkə ilə əhəmiyyətli enerji layihələri üzrə regional əməkdaşlıq daha da genişlənib.
Hesabatda, bu il İstanbulda Azərbaycan, Gürcüstan və Türkiyə xarici işlər nazirlərinin üçtərəfli görüşü, Cənub Qaz Dəhlizi və TANAP layihələrinin rəsmi açılış mərasimləri barədə məlumatlar da yer alıb.
Sənəddə strateji nəqliyyat dəhlizlərinin, ilk növbədə, Bakı-Tbilisi-Qars layihəsinin yerinə yetirilməsinin əhəmiyyəti vurğulanıb, Gürcüstan, Azərbaycan, Türkiyə və İran xarici işlər nazirlərinin birinci dördtərəfli görüşünün əməkdaşlığın yeni formatını yaratdığı qeyd olunub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
