GÜRCÜSTANDA GƏRGİNLİK ARADAN QALDIRILMIŞDIR

19.03.2004 [13:27]
Çap et
A⁺ A^-

AZƏRTAC-ın müxbiri Tbilisidən xəbər verir ki, ötən bazar günü Gürcüstan Prezidenti Mixail Saakaşvili Acarıstana buraxılmamışdır. Bununla əlaqədar Tbilisi ilə Batumi arasında ciddi böhran yaranmışdır. Martın 18-də dövlət başçısı ilə muxtar respublikanın rəhbəri Aslan Abaşidze arasında keçirilən görüşdən sonra yaranmış böhran aradan qaldırılmışdır.

Mixail Saakaşvili görüşdən sonra jurnalistlərə bildirmişdir ki, Acarıstana qarşı tətbiq edilən blokada ləğv olunacaqdır. Əldə edilən razılığa əsasən, Acarıstanda fövqəladə vəziyyət də aradan qaldırılacaqdır. Muxtar respublika ilə sərhəddə toplanan Gürcüstan hərbi qüvvələri öz hissələrinə geri qayıdacaqdır. Mixail Saakaşvili onu da demişdir ki, tərəflər arasında problem yoxdur.

O, Acarıstan müxalifətçilərinin mitinqində çıxış edərək bildirmişdir ki, yaxın günlərdə Gürcüstanın bütövləşmə prosesinə başlayacaqdır.