GÜRCÜSTANDA MİLLİ AZLIQLARIN DURUMU DƏYİŞƏCƏKMİ?!

31.12.2003 [02:43]
Çap et
A⁺ A^-

AZƏRTAC-ın müxbiri xəbər verir ki, Tbilisinin “Mariott” mehmanxanasının mətbuat mərkəzində milli azlıqlar və etnik qrupların liderlərinin görüşündə Gürcüstanda gedən ictimai-siyasi proseslərdə onların iştirakından söhbət açılmışdır. Müzakirələrə Gürcüstanda fəaliyyət göstərən ictimai birliklərin nümayəndələri ilə yanaşı, Azərbaycan və Ermənistandan gəlmiş nümayəndələr də qatılaraq, diqqəti mövcud problemlərə və yanvarın 4-də keçiriləcək növbədənkənar prezident seçkilərində milli azlıqların yaxından iştirakının vacibliyinə yönəltmişlər. Qeyd olunmuşdur ki, seçkilərə getmək öz Konstitusiya hüququnu müdafiə etmək, kimə səs vermək yox, seçkilərdə iştirak etməklə sənin əvəzinə başqalarının səs verməsinə yol verməmək və beləliklə də saxtakarlığın qarşısının alınması deməkdir.

Noyabrda keçirilmiş parlament seçkilərində passivliyin və saxtakarlığın daha çox yer aldığı etnik azərbaycanlıların və etnik ermənilərin yığcam yaşadığı Kvemo Kartli-Borçalı və Samtsxe-Cavaxeti bölgələrində insan hüquqlarının pozulması problemləri barədə Milli Məclisin deputatları Asim Mollazadə, Anar Məmmədxanlı, Ermənistanın sabiq təhlükəsizlik naziri David Şahnazaryan və digər hüquq müdafiəçiləri öz mülahizələrini bölüşmüşlər.

“Çoxmillətli Gürcüstan” hərəkatının lideri Arnold Stepanyan, “Gürcüstan mənim vətənimdir” ittifaqının sədri Əli Babayev, “Qeyrət” xalq hərəkatının lideri Əlibala Əsgərov, Gürcüstan Azərbaycanlıları İttifaqının sədri Süleyman Süleymanov və başqaları qeyri-gürcü əhalinin birliklərinin səylərini əlaqələndirmək məqsədilə vahid strategiya yaradılmasının vacibliyini vurğulamışlar. Bununla əlaqədar yanvarın sonlarında yeni iqtidar, habelə müxalifət nümayəndələrinin də iştirakı ilə geniş yığıncaq keçiriləcəyi bildirilmişdir.

GÜRCÜSTANDA MİLLİ AZLIQLARIN DURUMU DƏYİŞƏCƏKMİ?!

MÜƏLLİFLƏ ƏLAQƏ

Bölmənin digər xəbərləri