Gürcüstanda torpaq sürüşməsi nəticəsində itkin düşənlərin 8-i uşaqlardır
Tbilisi, 6 avqust, AZƏRTAC
Gürcüstanın Şovi bələdiyyəsi ərazisində baş vermiş torpaq sürüşməsi nəticəsində itkin düşənlərin axtarışları davam edir. Avqustun 5-də gecə saatlarında daha bir nəfərin cəsədi tapılaraq aidiyyəti üzrə təhvil verilib. Bununla da təbii fəlakət qurbanlarının sayı 17-yə çatıb.
AZƏRTAC xəbər verir ki, bu barədə jurnalistlərə Gürcüstan Daxili İşlər Nazirliyinin Fövqəladə Halların İdarə Olunması Mərkəzinin rəisi Teymuraz Mqrebişvili məlumat verib.
Bildirilib ki, 210 nəfər təxliyə olunub, 19 nəfərin axtarışları davam edir. İtkin düşmüş hesab olunan 19 nəfərdən 8-i uşaqlardır.
Axtarış-əməliyyat tədbirlərinə 400 xilasedici, 200 hərbçi və xüsusi texnika cəlb olunub.
Qeyd edək ki, təbii fəlakət zonası baş verən Şovi bələdiyyəsi dəniz səviyyəsindən 1500 metr hündürlükdə yerləşir. Torpaq sürüşməsi 50 hektar ərazini əhatə edib və palçığın hündürlüyü 5-6 metr təşkil edib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
