Hərbi təlimlər real təhdidlər zamanı birgə fəaliyyətə zəmin yaradır
Bakı, 10 dekabr, AZƏRTAC
Bir neçə gün əvvəl Azərbaycan və Türkiyə Silahlı qüvvələrinin birgə hərbi təlimləri keçirildi. Bu, artıq bir ənənə halını alıb ki, hər iki ölkənin Silahlı qüvvələrinin müxtəlif birlikləri genişmiqyaslı hərbi təlimlərdə birgə iştirak edirlər. İkinci Qarabağ müharibəsindən sonra bu təlimlər daha da intensivləşib. Eyni zamanda, keçirilməkdə olan sonuncu təlimlər həm məzmun, həm də keyfiyyət baxımından əvvəlkilərdən ciddi surətdə fərqlənir. İlkin olaraq belə bir sual meydana çıxır ki, indiki məqamda bu təlimlərin keçirilməsinin zərurəti nədən ibarətdir.
Birincisi, istənilən hərbi təlim əsasən iki zərurətdən meydana çıxır - hərbi bilik və bacarıqların artırılması, bölgədə Azərbaycana, eləcə də Türkiyəyə qarşı yarana biləcək təhdidlərə qarşı mübarizə ilə bağlı nəzəri biliklər əldə etmək. Təlimlər zamanı qoşun birlikləri arasında ümumi komandalığın yaradılması elementi də vacib məqamlardan biri kimi icra edildi.
Bu fikirləri AZƏRTAC-a açıqlamasında politoloq Amid Əliyev söyləyib.
Politoloq bildirib ki, bu təlimlər birbaşa olaraq son günlərdə İran tərəfindən Azərbaycana qarşı artan təhdidlərə real cavab kimi qiymətləndirilməlidir. Azərbaycan tərəfindən cənub bölgəsində Xüsusi Təyinatlıların təlimi oldu. Lakin görünən odur ki, bu təlimlər cənub qonşumuza o qədər də yetərli olmayıb. Buna görə də Azərbaycan genişmiqyaslı təlimlərin keçirilməsi zərurətindən irəli gələrək cənub bölgəsində bütün qoşun növlərinin iştirakı ilə təlimlər keçirdi. Əgər birinci təlimlər zamanı Azərbaycan ərazisinə keçə biləcək diversantların və texnikanın müəyyən olunaraq məhv edilməsi əsas şərt idisə, “Qardaş yumruğu” Araz çayının keçilməsi və həmin təhlükələrin yerində məhv edilməsi bacarıqlarının nəzəri və praktiki cəhətdən aşılanmasına istiqamətlənib. Bu isə öz növbəsində təlimlərin artıq keyfiyyətcə yeni xarakter aldığını deməyə əsas verir.
“Türkiyənin bu təlimlərdə iştirak etməsi həm hüquqi, həm də siyasi cəhətdən tam şəkildə əsaslandırılıb. Belə ki, Şuşa Bəyannaməsi Azərbaycana müasir türk ordusu sistemi əsasında Silahlı Qüvvələrdə yeni islahatların həyata keçirilməsini təmin edir. Eləcə də bu bəyannamə Azərbaycana qarşı real təhdidlər zamanı birgə fəaliyyətə də zəmin yaradır. Məhz buna görə Türkiyə regionda sülhün qorunmasının və təhlükəsizliyin təmin edilməsi məqsədilə daim Azərbaycana dəstək olacaq. Dövlətimizin başçısının “Türk ordusu hardadırsa, Azərbaycan ordusu da oradadır, Azərbaycan ordusu haradadırsa, Türk ordusu da ordadır” fikirləri siyasi məzmunlu olsa da, real hərbi məzmun kəsb edir. Son təlimlər də məhz bu şüara əsaslanaraq icra olunur, eyni zamanda, vacib mənəvi əhəmiyyət də daşıyır. Türkiyənin hər bir məqamda Azərbaycanın yanında olması və ölkəmizin milli maraqlarının qorunmasının başlıca prinsip kimi götürülməsi də məhz bu təlimlər vasitəsilə bir daha vurğulanır”, - deyə Amid Əliyev vurğulayıb.
O əlavə edib ki, son təlimlər İranla yanaşı, işğalçı Ermənistana dəstək verərək öz siyasi məqsədlərini Qarabağda reallaşdırmağa çalışan dairələrə də tutarlı cavab hesab oluna bilər. Bildiyimiz kimi, son günlər iranlı diversantların Xankəndiyə qanunsuz keçməsi, Rusiya sülhməramlılarının buna biganə qalması və Azərbaycanın mineral ehtiyatlarının qanunsuz istismarı kimi faktlar birbaşa milli təhlükəsizliyə olan təhdidlərdir. Azərbaycan dövləti ilkin olaraq Laçın dəhlizi üzrə filtrasiya prosesini təmin etmək üçün gömrük postunun qurulmasını təmin etdi və ərazilərin ekoloji monitorinqi üzrə strateji yol xəritəsinin hazırlanmasına da nail oldu. Ardınca isə bu təlimlərin keçirilməsi onu deməyə əsas verir ki, növbəti addımlarda artıq bölgəyə Azərbaycanın mülkü şəxsləri yox, hərbi kontingenti daxil olacaq. Azərbaycan milli maraq və təhlükəsizlik kəsb edən bütün məsələlər üzrə heç bir güzəşt variantının olmamasını məhz bu təlimlər vasitəsilə həmin dairələrin diqqətinə çatdırır.
Bölgədə sülhün qorunmasına yönəlik siyasət tətbiq edən Azərbaycan ümumilikdə bölgədə yeni təhlükəsizlik konsepsiyasını da yaradır. Bu konsepsiyada Ermənistan və onun işğalçı siyasətini dəstəkləmək istəyən dövlətlər, qüvvələr və dairələrə qarşı ən ciddi addımların atılması qırmızı xətlə müəyyən olunub.
Bölmənin digər xəbərləri
