Hesablama Palatası: Süni intellekt texnologiyalarının inkişafı kontekstində ali audit orqanlarının rolu artır
Bakı, 25 noyabr, AZƏRTAC
Süni intellekt texnologiyalarının inkişafı və rəqəmsal keçid, eləcə də iqlim dəyişikliklərinə qarşı mübarizə - zamanın tələblərinə cavab verən, aktual və strateji əhəmiyyət daşıyan məsələlərdir. Bu sahələrdə effektiv nəticələr əldə etmək üçün ilk növbədə, maliyyə intizamının gücləndirilməsi və rəqəmsal texnologiyalardan istifadənin genişləndirilməsi zəruridir. Bu kontekstdə ali audit orqanlarının rolu getdikcə artır.
Hesablama Palatasından AZƏRTAC-a verilən açıqlamada bildirilib ki, rəqəmsal transformasiya və süni intellekt texnologiyalarının inkişafı yalnız özəl sektor üçün deyil, dövlət idarəçiliyi və ictimai xidmətlər sahəsində də ciddi dəyişikliklərə yol açmaqdadır.
“Süni intellektin audit proseslərinə inteqrasiyası - istər böyük verilənlərin təhlili, istərsə də qabaqlayıcı nəzarət sistemlərinin qurulması baxımından - auditin effektivliyini xeyli artıracaq. Eyni dərəcədə vacib olan iqlim dəyişiklikləri və onunla bağlı risklər - artıq təkcə ekoloji deyil, sosial və iqtisadi sabitliyə təsir göstərən qlobal çağırış kimi qəbul olunur. Bu risklərə qarşı həyata keçirilən tədbirlərin maliyyələşdirilməsi ciddi resurs tələb edir. Həmin vəsaitlərin məqsədyönlü, şəffaf və nəticəyönümlü istifadəsi üçün isə ali audit orqanlarının nəzarət funksiyaları həlledici əhəmiyyət kəsb edir. Azərbaycan bu sahədə də beynəlxalq təşəbbüslərə fəal dəstək verir. Ölkəmizin ötən il COP29-a ev sahibliyi etməsi həm milli, həm də qlobal səviyyədə ətraf mühitin qorunması və iqlim dəyişikliklərinə qarşı birgə mübarizə əzmimizin göstəricisidir”, - deyə qurumun açıqlamasında vurğulanıb.
Qeyd olunub ki, bu təşəbbüslərin uğurla həyata keçirilməsi, Azərbaycan Respublikasının Prezidenti İlham Əliyevin strateji baxışının və davamlı dəstəyinin nəticəsidir. Prezidentin rəhbərliyi ilə ölkəmizdə rəqəmsal idarəetmə və ekoloji davamlılıq sahəsində ardıcıl islahatlar aparılır, dövlət idarəçiliyində şəffaflıq və hesabatlılıq prinsipləri daha da möhkəmləndirilir. Bu isə ali audit orqanının ictimai maraqların qorunmasında və milli inkişaf prioritetlərinin reallaşmasında daha fəal mövqe tutmasına imkan yaradır.
Bölmənin digər xəbərləri
