Həsən Seyidovun 85 illik yubileyi qeyd olunub
Tbilisi, 16 sentyabr, AZƏRTAC
Sentyabrın 16-da Gürcüstanda azərbaycanlıların yığcam yaşadıqları Marneuli şəhərində ictimai-siyasi xadim Həsən Seyidovun anadan olmasının 85 illik yubileyi qeyd edilib.
AZƏRTAC xəbər verir ki, Milli Məclisin Azərbaycan-Gürcüstan parlamentlərarası əlaqələr üzrə işçi qrupun rəhbəri, Azərbaycan Mətbuat Şurasının sədri Əflatun Amaşovun və Gürcüstan parlamentinin deputatı Ruslan Hacıyevin təşəbbüsü ilə təşkil edilən tədbirin iştirakçıları əvvəlcə H.Seyidovun anadan olduğu Qaçağan kəndində olublar. Onun anadan olduğu evə baş çəkilib, kəndin mərkəzindəki büstü önünə gül dəstələri qoyulub.
Sonra tədbir Marneuli şəhərində davam edib. Əflatun Amaşov, Ruslan Hacıyev və başqaları çıxış edərək Həsən Seyidovun həyat yoluna nəzər salıblar.
Bildirilib ki, Həsən Seyidov 1932-ci il avqustun 16-da Marneuli rayonunun Qaçağan kəndində anadan olub. O, 1956-cı ildə Azərbaycan Politexnik İnstitutunun mexanika fakültəsini fərqlənmə diplomu ilə bitirib və elə həmin ildən əmək fəaliyyətinə başlayıb. Müxtəlif vəzifələrdə çalışan Həsən Seyidov qabiliyyəti, bacarığı ilə daim seçilib. Azərbaycan Kommunist Partiyası Mərkəzi Komitəsinin katibi və Nazirlər Sovetinin sədri vəzifələrində işlədiyi zaman xalqa şərəflə xidmət edib. Bununla da o, Azərbaycan xalqının böyük hörmət və məhəbbətini qazanıb.
Qeyd olunub ki, Həsən Seyidov Gürcüstanda yaşayan soydaşlarımızı da diqqətdə saxlayıb. O, borçalılıların Azərbaycan Televiziyasını izləyə bilmələri üçün ötürücü stansiya tikdirib, Qaçağan kəndinə qaz və su kəmərləri çəkdirib. Onun Gürcüstan hökumətindən xahişi ilə Qaçağan kəndində müasir tipli üçmərtəbəli məktəb binası inşa edilib. Həsən Seyidovun xidmətləri layiqincə qiymətləndirib, o, “Lenin” ordeni, üç dəfə “Qırmızı Əmək Bayrağı” ordeni və digər medallarla təltif olunub.
Tədbirdə Həsən Seyidovun qardaşı Elbrus Seyidov çıxış edərək qardaşının xatirəsinin yad olunmasına görə ailəsi adından minnətdarlığını bildirib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
