Hindistanda İndira Qandinin nəvəsi barədə məhkəmə qərarının icrası dayandırılıb
Bakı, 4 avqust, AZƏRTAC
Hindistan Ali məhkəməsi müxalifətçi Rahul Qandinin apelyasiya şikayətini təmin edib və 2019-cu ildə açılmış iftira barədə cinayət işi üzrə qərarın icrasını dayandırıb.
AZƏRTAC Press Trust of India agentliyinə istinadla xəbər verir ki, Ali məhkəmə Rahul Qandi haqqında hökmün icrasını dayandıra biləcək sonuncu instansiya idi. Məhkəmənin qərarından sonra siyasətçi deputat səlahiyyətlərini bərpa edə və seçkilərə iştirak hüququ qazana biləcək.
Martın 23-də Surat şəhər məhkəməsi Rahul Qandini Hindistanın hazırkı Baş naziri Narendra Modinin soyadı ilə bağlı dediklərini böhtan hesab edərək onu iki il həbs cəzasına məhkum edib. Müxalif siyasətçi 2019-cu ildə Qucarat ştatında mitinq zamanı o vaxt ölkədən qaçan Nirav Modi və Lalit Modi ilə bağlı qalmaqala işarə edərək, “nə üçün bütün oğrular Modi soyadı daşıyır”, - deyə ritorik sual səsləndirib.
Əlli iki yaşlı Rahul Qandi Hindistanın müstəqillik tarixinin çox hissində ölkəni idarə edən Nehru - Qandi siyasi klanının nümayəndəsi, həmçinin ölkədə ən qədim siyasi güc olan Hindistan Milli Konqresinin liderlərindən biridir. Rahul Qandi Raciv Qandinin (1944-1991) oğlu, İndira Qandinin (1917-1984) nəvəsi və Cəvahirləl Nehrunun (1889-1964) nəticəsidir.
Bölmənin digər xəbərləri
