Hollandiyada BAK-ın lll qurultayı keçiriləcəkdir
Paris, 10 dekabr ( AZƏRTAC ). Əsas mənzil-qərargahı Amsterdamda yerləşən Benilüks Azərbaycanlıları Konqresinin (BAK) mətbuat xidmətindən AZƏRTAC-a bildirmişlər ki, 2006-cı ildə yaradılmış BAK ötən dövr ərzində Benilüks məkənına daxil olan Niderland və Belçika krallıqlarında, Lüksemburq hersoqluğunda diasporumuzun təşkilatlanmasında və formalaşmasında mühüm işlər görmüşdür. BAK Azərbaycan həqiqətlərinin Avropa ictimaiyyətinə çatdırılmasında, xalqımızın milli mədəni irsinin, zəngin tarixinin təbliğində tədbirlər həyata keçirmiş və hazırda Azərbaycan diasporunun fəaliyyətinin daha da genişləndirilməsi istiqamətində məsədyönlü iş aparır.
BAK-ın idarə heyəti qurumun qarşıdakı fəaliyyətini və vəzifələrini müəyyənləşdirmək məqsədilə onun növbəti lll qurultayının dekabrın 17-də Amsterdamda keçirilməsini qərara almışdır. Həmin vaxt BAK-ın yaradılmasının beşilliyi ilə əlaqədar yubiley tədbirlərin də keçirilməsi nəzərdə tutulmuşdur.
Qurultayda BAK-ın idarə heyətinin yeni tərkibi müəyyənləşdiriləcək və yeni sədr seçiləcəkdir. Qurultay və yubiley tədbirlərində Milli Məclisin deputatları, Hollandiya və Belçikada akkreditə olunmuş diplomatik korpusun əməkdaşları, Azərbaycan və Türkiyənin diaspor təşkilatlarının rəhbərləri, mədəniyyət və incəsənət xadimləri, jurnalistlər iştirak edəcəklər.
Əsgər Əliyev
AZƏRTAC-ın xüsusi muxbiri
Paris
Bölmənin digər xəbərləri
