Honkonq bütün qeyri-rezidentlərin şəhərə girişə qadağa qoyacaq
Pekin, 23 mart, AZƏRTAC
Çinin Honkonq xüsusi inzibati bölgəsi yeni növ koronavirusun (COVID-19) yayılmasının qarşısını almaq məqsədi ilə martın 25-dən başlayaraq bütün qeyri-rezidentlərin şəhərə girişinə qadağa qoyacaq.
AZƏRTAC xəbər verir ki, inzibati bölgə hökumətinin rəhbəri xanım Kəri Lam qadağanın 14 gün qüvvədə olacağını açıqlayıb. Bildirilir ki, belə bir qərarın qəbul edilməsi son günlər inzibati bölgəyə xaricdən gələnlər arasında COVID-19 infeksiyasına yoluxma hallarının çoxalması ilə bağlıdır.
Kəri Lam bildirib ki, Honkonq hava limanı bütün tranzit uçuşları da dayandıracaq. Çinin Makao xüsusi inzibati bölgəsindən və Tayvan adasından gələnlər isə 14 gün müddətinə karantinə alınacaqlar.
İndiyədək Honkonqda 356 yoluxma halı qeydə alınıb ki, onların da çoxu xaricdən gələnlərdə və ya xaricə səfər edənlərdə aşkarlanıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
