“Horizon Avropa” Tədqiqat və İnnovasiya Proqramı üzrə məlumat günləri davam edir
Bakı, 27 iyul, AZƏRTAC
Avropa Komissiyasının (AK) “Horizon Avropa” Tədqiqat və İnnovasiya Proqramı üzrə məlumat günləri davam edir.
Bu barədə AZƏRTAC-a AMEA-dan məlumat verilib. Bildirilib ki, məlumat günləri çərçivəsində növbəti tədbir Elm və Təhsil Nazirliyinin Botanika İnstitutunda keçirilib.
Tədbirdə AMEA Rəyasət Heyəti aparatının Xarici əlaqələr və beynəlxalq elmi təşkilatlarla iş şöbəsinin müdiri dosent Esmira Əlirzayeva “Horizon Avropa” proqramı üzrə istiqamətlər və Milli Əlaqələndirici Şəxs (MƏŞ) şəbəkəsinin fəaliyyəti haqqında məlumat verib, çağırışlarda uğurlu iştirak, konsorsiumlara qoşulmaq üçün yanaşmaları diqqətə çatdırıb. O qeyd edib ki, Azərbaycan tədqiqatçıları üçün “Horizon Avropa” proqramında uğurlu iştirakın təmin edilməsi məqsədilə sentyabr ayında AK-nın ekspertlərinin iştirakı ilə layihələrin hazırlanması üzrə növbəti təlimlərin və fərdi məsləhətlərin təşkil edilməsi nəzərdə tutulub. Məruzəçi COST proqramı haqqında məlumat verib və qeyd edib ki, bu proqram “Horizon Avropa” çağırışlarında iştirak üçün konsorsiumlara qoşulmaq istiqamətində geniş imkanlar açır. Proqram çərçivəsində iştirak etdiyi layihə üzrə təcrübəsini bölüşüb və Azərbaycan mütəxəssislərinin qoşulduğu uğurlu layihələr haqqında məlumat verib.
“Horizon Avropa” proqramının Rəqəmsal, Sənaye və Kosmos klasteri üzrə MƏŞ, Elm və Təhsil Nazirliyinin İdarəetmə Sistemləri İnstitutunun Xarici əlaqələr şöbəsinin müdiri texnika elmləri üzrə fəlsəfə doktoru Tofiq Babayev “Horizon Avropa”nın məqsədləri, əldə edilmiş nəticələr, proqramın klasterləri, onların əhatə dairəsi və hər biri üzrə maliyyə imkanları, proqrama müraciət üçün tələblər, yeniliklər və perspektivlər üzrə ətraflı məlumat verib. Məruzəçi bu proqramlar çərçivəsində iştirak etdiyi layihələr, həmçinin hazırda Azərbaycanın müxtəlif təşkilatlarının alimləri tərəfindən həyata keçirilən layihələr üzrə təcrübəsini bölüşüb, iştirakçıları proqramın imkanlarından istifadəyə təşviq edib.
İqlim, Enerji və Mobillik klasteri üzrə MƏŞ, Elm və Təhsil Nazirliyinin akademik Həsən Əliyev adına Coğrafiya İnstitutunun aparıcı elmi işçisi, coğrafiya üzrə fəlsəfə doktoru Rövşən Kərimov “Horizon Avropa” portalında çağırışların araşdırılması, müvafiq çağırışlar üzrə tərəfdaşların müəyyən edilməsi üçün müxtəlif yanaşmaları, onlarla əlaqələrin qurulması qaydalarını praktik formada təqdim edib. Bildirilib ki, çağırışlar multidisiplinar xarakterli olduğuna görə müxtəlif klasterlər üzrə müvafiq imkanları müəyyən etmək mümkündür. Məruzəçi iqlim dəyişikliyi üzrə hazırda açıq olan və sentyabr-oktyabr aylarında elan ediləcək çağırışları, onların məqsədləri və büdcə imkanları haqqında məlumat verib.
Ərzaq, Bioiqtisadiyyat, Təbii ehtiyatlar, Kənd təsərrüfatı və Ətraf mühit klasteri üzrə MƏŞ, biologiya üzrə fəlsəfə doktoru Fərid Seyfullayev proqramın 2023-2024-cü illər üzrə iş proqramının araşdırılması, müvafiq çağırışların, onlar haqqında ətraflı məlumatın, məqsədlərinin, tələblərin müəyyənləşdirilməsi üzrə interaktiv təqdimat edib. Məruzəçi biomüxtəlifliyin “Horizon Avropa” proqramında prioritet istiqamət olduğunu diqqətə çatdırıb və iştirakçıları bu istiqamət, həmçinin ərzaq təhlükəsizliyi və ətraf mühit problemlərini əhatə edən, hazırda elan edilmiş və 2023-cü il ərzində elan ediləcək çağırışlarla tanış edib.
İştirakçılar “Horizon Avropa” proqramında iştirakda maraqlı olduqlarını ifadə ediblər. Botanika İnstitutunun baş direktoru professor Səyyarə İbadullayeva institutun mövcud beynəlxalq əlaqələri haqqında məlumat verib və müvafiq istiqamətlər üzrə çağırışlarla əlaqəli fikir mübadiləsi edib.
Məruzələr ətrafında müzakirələr aparılıb, suallar cavablandırılıb.
Bölmənin digər xəbərləri
