İctimai fəal: Ermənistan sülh sazişini imzalamaq prosesindən yayınmaqla yalnız özünə ziyan vurur
Bakı, 4 avqust, AZƏRTAC
Prezident İlham Əliyev 44 günlük Vətən müharibəsi dönəmində olduğu kimi, postmüharibə dövründə də hər dəfə xarici media orqanlarına verdiyi müsahibələrində hər bir Azərbaycan vətəndaşının ürəyindən keçənləri dünya ictimaiyyətinin diqqətinə çatdırır. Dövlətimizin başçısının “Euronews” kanalına müsahibəsi də bu baxımdan xüsusi əhəmiyyət kəsb edir.
Bu fikirləri AZƏRTAC-a açıqlamasında Azərbaycan Gənclərinin Avropaya İnteqrasiyası Təşkilatının İdarə Heyətinin üzvü, ictimai fəal Nərgiz Xələf söyləyib.
N.Xələf bildirib ki, Azərbaycan xalqı, ordusu, dövləti İkinci Qarabağ müharibəsində yalnız Ermənistana deyil, bütün dünyaya cəsarətini, əzmini göstərmiş oldu. Bunun qarşısında isə Ermənistan məğlubiyyətini qəbul edərək kapitulyasiya aktına qol çəkdi. Lakin həmin vaxtdan 3 ilə yaxın müddət keçməsinə baxmayaraq, Ermənistan hökuməti hər zaman olduğu kimi yalanları və bəhanələri ilə normallaşma prosesinə əngəl törədir. Ermənistan tərəfi sülh sazişini imzalamaq prosesindən yayınmaqla yalnız özünə ziyan vurur.
“Azərbaycan dövləti onun ərazisində yaşayan erməniləri 30 illik işğal dövründə olduğu kimi, indi də digər xalqların nümayəndələri kimi himayə etməyə hazırdır. Mən özümdən nümunə çəkmək istəyərdim ki, məktəbdə oxuduğumuz dövrdə də, bu gün də qonşuluğumuzda ermənilərin yaşadıqlarının şahidi olmuşuq. Onlara Azərbaycanda yaşamaq çətin və mümkünsüz olsaydı, çoxdan çıxıb gedərdilər.
Azərbaycan xalqı tarixboyu tolerantlığı ilə seçilib. Hətta bəzi məqamlarda həddən artıq tolerant olmağımız bizim əleyhimizə işləyib. Amma Azərbaycan dövləti və xalqı heç nəyə baxmayaraq, tolerantlıq dəyərinə hər zaman sadiqdir. Prezident İlham Əliyevin “Euronews” kanalına verdiyi müsahibəsində söylədiyi kimi, ölkəmizin ərazisində yaşayan ermənilərin bütün hüquqlarının, ümumiyyətlə, rahatlığının təminatçısıdır. Amma Qarabağda yaşayan erməni əhalinin Azərbaycan dövlətinə qarşı saymamazlığı artıq onu seçim qarşısında qoya bilər. Bu seçimi Azərbaycan tərəfinin öz ərazisində yaşayan ermənilərə verməsi isə onun legitim hüququdur. Ya yaşadığın ölkənin ərazi bütövlüyünü tanıyıb dövlətinə, qanunlarına hörmət edib tabe olacaqsan, ya da özünü hansı ölkədən hiss edirsənsə, gedib orada məskunlaşacaqsan”, - deyə ictimai fəal vurğulayıb.
N.Xələf bildirib ki, “Laçın” dövlət sərhədindən buraxılış məntəqəsinin qurulduğu vaxtdan indiyədək Qarabağın 2 mindən artıq sakini Ermənistana rahat şəkildə gedib və geri qayıdıb. Revanşist Ermənistan təxribatlar törətməklə və Azərbaycan tərəfini Laçın-Xankəndi yolunu bağlamaqda ittiham etməklə özünü gülünc vəziyyətə qoyur.
Ermənistanın Beynəlxalq Qırmızı Xaç Komitəsindən öz çirkin məqsədləri üçün istifadə etdiyini vurğulayan ictimai fəal deyib: “Dövlətimizin başçısı haqlı olaraq Beynəlxalq Qırmızı Xaç Komitəsinin Xankəndidəki ofisinin Bakıya deyil, İrəvana tabe olması ilə bağlı iradlarını bildirdi və bunu Azərbaycanın legitim tələbi kimi xarakterizə etdi.
Azərbaycan Gənclərinin Avropaya İnteqrasiyası Təşkilatının təmsilçisi, Azərbaycan ilə Avropa arasında əlaqələrin inkişafını, genişlənməsini dəstəkləyən biri kimi ikili standartlardan çox məyus oluram. Bütün dünya, hətta Ermənistanın baş naziri Qarabağın Azərbaycan ərazisi olduğunu etiraf edir. Beynəlxalq Qırmızı Xaç Komitəsi də beynəlxalq hüquqa hörmət edərək Xankəndidəki ofisinin Bakı ofisinin tabeliyinə verilməsini təmin etməlidir”.
Bölmənin digər xəbərləri
