Bakı, 29 iyun, AZƏRTAC

Azərbaycanda ali təhsil müəssisələrində tədrisin keyfiyyətinin yüksəldilməsi, rəqəmsallaşma, məzunların rəqabət qabiliyyətinin artırılması prioritet istiqamətlərdən birinə çevrilib. Azərbaycan Memarlıq və İnşaat Universitetinin tədris işləri üzrə prorektoru, professor Akif Qasımov AZƏRTAC-a müsahibəsində tədrisdə tətbiq olunan rəqəmsallaşmadan, süni intellektdən, abituriyentlər üçün universitetin üstünlüklərindən, tələbələri gözləyən yeniliklərdən, eləcə də beynəlxalq əməkdaşlıq və ikili diplom proqramlarından danışıb. Onunla müsahibəni təqdim edirik.

-Tədrisin keyfiyyətinin artırılması istiqamətində hansı yeniliklər tətbiq olunur?

-Hər bir ali təhsil müəssisəsi üçün təhsilin keyfiyyətinin artırılması strateji istiqamətlərdən biridir. Təhsilin keyfiyyətini artırmaqla əmək bazarının tələblərinə cavab verən, rəqabətqabiliyyətli mütəxəssislərin hazırlanması qarşıya əsas məqsəd kimi qoyulub. Bu istiqamətdə ilk növbədə ümumi təhsil müəssisələrində iş aparılır və yüksək bal toplayan, hazırlıqlı abituriyentlərin universitetə cəlb olunmasına xüsusi diqqət yetirilir. Tədris prosesində keyfiyyətli təhsilin təmin olunması üçün tədris proqramları müasirləşdirilir, eyni zamanda, həmin proqramlar aparıcı istehsalat müəssisələrinin mütəxəssisləri tərəfindən ekspertizadan keçirilir. Bu, çox vacib şərtlərdən biridir. Çünki məzunların istehsalat sahəsində uğurla fəaliyyət göstərə bilmələri üçün əmək bazarının tələblərinə uyğun bilik və bacarıqlara malik olmaları vacibdir. Hansı bilik və bacarıqların tələb olunduğunu isə istehsalat sahəsində çalışan mütəxəssislər müəyyənləşdirirlər. Tədrisin keyfiyyətinin artırılması üçün bir sıra işlər həyata keçirilir. Ən vacib məsələlərdən biri müasir tədris proqramlarının hazırlanmasıdır. Bu məqsədlə tədris proqramları mütəmadi olaraq yenilənir və texnologiyanın inkişafı nəzərə alınaraq müasir yanaşmalar tətbiq edilir. Bundan əlavə, tədris prosesinə nəzarət sistemi təkmilləşdirilir və dərslərin müasir metodlarla keçirilməsinə diqqət yetirilir. Müəllimlər də bu istiqamətdə daim öz üzərlərində işləməli, tələbəyönümlü tədris metodlarını mənimsəməlidirlər. Məqsəd odur ki, universiteti bitirən məzunlar yüksəksəviyyəli bilik və bacarıqlara malik olsunlar.

- Rəqəmsallaşma və süni intellekt tədrisə necə inteqrasiya edilir?

- Bu gün rəqəmsallaşma və süni intellekt təhsil sisteminin ayrılmaz hissəsinə çevrilib. Universitet də bu istiqamətdə mühüm addımlar atır. Məqsəd süni intellektdən həm müəllimlərin, həm də tələbələrin düzgün və məqsədyönlü istifadə etməsini təmin etməkdir. Süni intellekt düzgün istifadə olunduqda tədris prosesinə böyük fayda verir. Əks halda isə onun mənfi təsirləri ola bilər. Buna görə universitet bu texnologiyaların səmərəli tətbiqinə xüsusi diqqət yetirir.

-Azərbaycan Memarlıq və İnşaat Universitetinə qəbul olan tələbələr hansı üstünlükləri əldə edirlər?

-Bildiyiniz kimi, Azərbaycan Memarlıq və İnşaat Universiteti memarlıq və inşaat sahələri üzrə yüksəkixtisaslı mütəxəssislər hazırlayır. Eyni zamanda, informasiya texnologiyaları və kibertəhlükəsizlik istiqamətlərində kadr hazırlığı həyata keçirilir. Bu gün ölkəmizdə, xüsusilə regionların inkişafı və işğaldan azad olunmuş ərazilərin yenidən qurulması prosesində peşəkar memarlara, dizaynerlərə, inşaat mühəndislərinə və digər mühəndis kadrlara böyük ehtiyac var. Universitetin əsas məqsədi əmək bazarının tələblərinə cavab verən, yüksək bilik və bacarıqlara malik mütəxəssislər hazırlamaqdır.

-Abituriyentlərə hansı tövsiyələri verərdiniz?

-Abituriyentlər ilk növbədə ixtisas seçimini öz maraq və bacarıqlarına uyğun etməlidirlər. Topladıqları bala uyğun müxtəlif seçim imkanları olsa da, əsas məsələ gələcəkdə sevəcəkləri peşəni seçməkdir.

Biz çalışırıq ki, birinci kursdan etibarən “İxtisasa giriş” fənni vasitəsilə tələbələrə seçdikləri ixtisas haqqında geniş məlumat verək. Onlara izah olunur ki, həmin ixtisası bitirdikdən sonra hansı sahələrdə işləyə bilərlər, gələcək karyera imkanları nələrdir və ölkənin inkişafında onların rolu nə olacaq. Bu yanaşma tələbələrin öz ixtisaslarını daha yaxşı tanımalarına kömək edir və sonradan peşman olub ixtisas dəyişmək hallarının qarşısını alır.

- Azərbaycan Memarlıq və İnşaat Universitetinə qəbul olunan tələbələri hansı yeniliklər gözləyir?

- Bizim əsas məqsədimiz şəffaf və obyektiv təhsil mühiti yaratmaqdır. Müəllim–tələbə münasibətlərinin sağlam və şəffaf qurulmasına xüsusi diqqət yetirilir. Bununla yanaşı, universitet rəhbərliyi tələbələrin əlavə bilik və bacarıqlar əldə etməsi üçün müxtəlif imkanlar yaradır. Xüsusilə ixtisas üzrə vacib proqramların öyrədilməsi prioritet istiqamətlərdəndir.

Universiteti bitirən məzun yalnız diplom deyil, həm də həmin proqramlar üzrə sertifikat əldə edir. Bu isə onların əmək bazarında rəqabət qabiliyyətini artırır və iş tapmalarını asanlaşdırır.

-Beynəlxalq əməkdaşlıq və ikili diplom proqramları istiqamətində hansı işlər görülür?

- Bu istiqamətdə işlər bir neçə sahəni əhatə edir. İlk növbədə, xarici universitetlərlə əməkdaşlıq müqavilələri imzalanır, yeni tərəfdaşlıqlar qurulur və akademik əlaqələr genişləndirilir.

Ən vacib istiqamətlərdən biri ikili diplom proqramlarıdır. Hazırda universitetdə bakalavriat və magistratura səviyyələri üzrə müxtəlif ikili diplom proqramları həyata keçirilir.

Bakalavriat səviyyəsində tələbələr təhsilin bir hissəsini Azərbaycan Memarlıq və İnşaat Universitetində, digər hissəsini isə tərəfdaş xarici universitetdə davam etdirirlər. Təhsili uğurla başa vurduqdan sonra hər iki universitetin diplomunu əldə edirlər. Magistratura səviyyəsində də analoji proqramlar həyata keçirilir. Tələbələr birinci ili universitetimizdə, ikinci ili isə xarici tərəfdaş universitetdə oxuyurlar və məzun olduqda hər iki universitetin diplomuna sahib olurlar. Bu istiqamətdə universitetin dünyanın nüfuzlu ali təhsil müəssisələri ilə əməkdaşlığı mövcuddur. Məsələn, İstanbul Texniki Universiteti ilə inşaat mühəndisliyi üzrə ikili diplom proqramı həyata keçirilir. Bundan başqa, Ankara Universiteti, Milan Politexnik Universiteti, Böyük Britaniyanın bir sıra universitetləri, eləcə də ABŞ, Portuqaliya və Türkiyənin müxtəlif universitetləri ilə magistratura səviyyəsində ikili diplom proqramları həyata keçirilir. Bu proqramlar tələbələrin beynəlxalq təcrübə qazanmasına, müasir bilik və bacarıqlara yiyələnməsinə, həmçinin beynəlxalq əmək bazarında daha rəqabətqabiliyyətli mütəxəssis kimi formalaşmasına geniş imkan yaradır. Universitetin əsas məqsədi müasir dövrün tələblərinə cavab verən, yüksək ixtisaslı, rəqabətqabiliyyətli və peşəkar mütəxəssislər hazırlamaqdır. Bu istiqamətdə tədrisin keyfiyyətinin yüksəldilməsi, rəqəmsallaşmanın tətbiqi, beynəlxalq əməkdaşlığın genişləndirilməsi və tələbələrin praktiki biliklərinin artırılması istiqamətində işlər davam etdirilir.

_{Müxbir – Tünzalə Zeyvəliyeva}