“İQTİSADİYYAT VƏ AUDİT” JURNALININ LAUREATLARI
Jurnalın redaksiyasından AZƏRTAC-a bildirmişlər ki, “Auditor xidmətinin inkişaf problemləri mövzusunda auditorların və mütəxəssislərin jurnalda dərc olunmuş ən yaxşı yazıları” nominasiyası üzrə birinci mükafat “Müasir dövrdə təsərrüfat subyekti üçün auditin əhəmiyyəti və onun inkişaf problemləri” və “Auditor kadrlarının hazırlanmasının inkişaf istiqamətləri” məqalələrinə görə Auditorlar Palatasının elmi tədqiqat, inkişaf və tədris mərkəzinin direktoru, iqtisad elmləri namizədi Yaşar Məmmədova verilmişdir. “Respublikanın neft və qaz sənayesində ümumi istehsal xərclərinin tədqiqi” və “Maliyyə məhdudiyyəti şəraitində neft və qaz sənayesinin fəaliyyətinin iqtisadi-riyazi modelləşdirilməsi” məqalələrinə görə ARDNŞ prezidentinin iqtisadiyyat və maliyyə məsələləri üzrə müşaviri, iqtisad elmləri namizədi, dosent Rafiq Əliyev və “Azərbaycanın təbii sərvətləri və onun iqtisadi qiymətləndirilməsi haqqında” məqaləsinə görə Ekologiya və Təbii Sərvətlər Nazirliyinin elm şöbəsinin rəisi, fizika-riyaziyyat elmləri namizədi Elman Yusifov ikinci mükafata, “Gəlirin olmadığı dövrdə xərclərin mühasibat uçotunda əks etdirilməsi” məqaləsinə görə İqtisadi İslahatlar Mərkəzinin dissertantı Vəli Rəhimov və Auditorlar Palatasının Maliyyə Departamentinin direktor müavini Fərəh İslamova, “Bank məhsullarının inkişaf strategiyası” məqaləsinə görə “Atabank” səhmdar cəmiyyəti daxili audit xidmətinin rəhbəri Müseyib Əliyev və “Əmlakın icarəyə verilməsindən əldə olunan gəlirin mühasibat uçotunda əks etdirilməsi” məqaləsinə görə Dövlət İqtisad Universitetinin dissertantı Alidə Mahmudova üçüncü mükafata layiq görülmüşlər.
Mövzu məhdudiyyəti qoyulmadan “Gənc tədqiqatçıların ən yaxşı məqalələri” nominasiyasında birinci mükafatı “Azərbaycanın yeni neft strategiyası: “mübahisəli yataqlar” kimin üçün mübahisəlidir?” məqaləsinə görə Bakı Dövlət Universitetinin beynəlxalq münasibətlər kafedrasının magistrantı Aysel Yaqubova almışdır. İkinci yer üçün mükafat “Maliyyə nəzarətinin mahiyyəti və dövlətin idarə olunmasında onun əhəmiyyəti” məqaləsinə görə İqtisadi İslahatlar Mərkəzinin dissertantı Mübariz Hacıyevə, üçüncü yer üçün mükafat isə “Naxçıvanda sahibkarlığın inkişaf etdirilməsində gömrük amilinin rolu” məqaləsinə görə Dövlət İqtisad Universitetinin aspirantı Səhət Həbibbəyliyə verilmişdir.
