İranın anti-Azərbaycan mövqeyi İslam ənənələrinə ləkədir – Şərh
Bakı, 10 aprel, AZƏRTAC
Hazırda dünya ictimaiyyəti də etiraf edir ki, Azərbaycan güclü dövlətdir və ölkənin idarəçiliyi, o cümlədən müdafiəsi etibarlı əllərdədir. Prezident İlham Əliyevin rəhbərliyi ilə həyata keçirilən daxili və xarici siyasət xalq tərəfindən yüksək səviyyədə dəstəklənir. Bu gün Azərbaycanda dövlət maraqları ətrafında sarsılmaz milli birlik mövcuddur. 2020-ci il sentyabrın 27-də işğalçı Ermənistan sərhədboyu ərazilərimizdə genişmiqyaslı təxribatlar törədən zaman da bu birliyin və həmrəyliyin şahidi olduq. O zaman yenilməz Ordumuzun işğalçı Ermənistan silahlı qüvvələrini diz çökdürməsi və tarixi Qələbə qazanması bir daha göstərdi ki, heç bir düşmən qüvvə ölkəmizin suverenliyini və təhlükəsizliyini təhdid edə, iradəmizi sarsıda bilməz. Bu şanlı Zəfərdən sonra Azərbaycanın dünya birliyindəki reytinqi daha da yüksəldi. Heç şübhəsiz, ölkəmizin inkişafını istəməyən qüvvələr bu uğurlarımızı həzm edə bilmirlər. Təəssüf ki, belələrindən biri də İran İslam Respublikasıdır.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, İran Ermənistanla Azərbaycan arasındakı müharibə zamanı özünü haqq-ədalətin, beynəlxalq hüququn tərəfdarı kimi yox, qatı anti-Azərbaycan kimi göstərdi. Bunu Ermənistanın dövlət rəsmləri və media vasitələri də etiraf edirlər. Qarabağ müharibəsi zamanı İranın erməni tərəfinə hərbi və kəşfiyyat dəstəyi göstərməsi artıq öz təsdiqini tapıb. Əslində, İslam dövləti olan İran Ermənistanın Azərbaycan ərazilərini işğal etdiyi zaman məscidlərdə donuz və digər heyvanların saxlanılmasına ciddi etirazını bildirməli idi. Çünki ermənilərin bu həyasızlığı bütövlükdə müsəlmanlara, İslam dünyasına, dinimizə təhqir idi. Dünyanın əksər müsəlman dövlətləri Ermənistanın bu vəhşiliyinə kəskin etirazını bildirsə də, əksinə, İran İslam Respublikası Ermənistanla qardaşlıq münasibətləri qurdu və bununla da İslam ənənələrinə ləkə gətirdi, xəyanət etdi. Azərbaycanın dünya birliyindəki reytinqi yüksəldikcə bundan ən çox qısqanclıq keçirən İran oldu. Səbəbi nə idi? Fars-molla rejimi Azərbaycanın dünyada artan nüfuzunu həzm edə bilmirdi və ölkəmizə qarşı düşmənçiliyini açıq şəkildə büruzə verirdi. İranın ölkəmizə qarşı təxribatçı və düşmənçilik hərəkətlərinin davamlı şəkil alması qonşuluq münasibətlərinə sarsıdıcı zərbə vurmaqla yanaşı, İslam dünyasının da nüfuzuna xələl gətirir.
Ə.Bədəlov bu il yanvarın 27-də Azərbaycanın İrandakı səfirliyinə silahlı hücumu xatırladıb və bildirib ki, bu terror hadisəsi İranın Vyana Konvensiyasının müddəalarına əməl etməməsinin, beynəlxalq hüquq prinsiplərinə saymazlığın bariz nümunəsidir. Bu hadisə bir daha təsdiqlədi ki, İran öz ölkəsindəki diplomatik nümayəndəlikləri qorumaq iqtidarında deyil və bir çox hallarda diplomatik nümayəndəliklərə qarşı təxribatlar dövlət səviyyəsində təşkil olunur. Bundan sonra Paşinyanın həyat yoldaşı Anna Akopyanın başına hicab bağlayıb İrandakı məscidlərdə yerli dindar qadınlarla ibadət adı ilə bir sırada otuzdurmaq bu ölkə üçün xəcalətverici hadisədir. Görəsən, Ermənistanın müsəlman məscidlərində donuz saxlamasından sonra qatı antiislamçı olan Anna Akopyanın İran məscidlərində “ibadət etməsi”nə nə ad vermək olar? Bunların fərqi varmı? İran rəsmilərinin bu hərəkəti İslama xəyanət deyilmi?
Siyasi şərhçi bildirib ki, İranın Azərbaycanın İsrail Dövlətində səfirliyinin açılmasından ciddi narahatlıq keçirməsi və bunu parlament səviyyəsində müzakirə etməsi başa düşüləndir: “Yəni, artıq Azərbaycanın əlaqələrinin genişlənməsi, mövqeyinin getdikcə möhkəmlənməsi düşmən dövlətlərin narahatlığına səbəb olub. Deməli, Azərbaycan dünyada söz sahibinə çevrilir və güclü dövlət kimi diqqət mərkəzindədir. Bəs Azərbaycan torpaqları 30 il işğal altında saxlanılanda, tarixi mədəni abidələrimiz, müqəddəs ibadətgahlarımız, məscidlərimiz yerlə-yeksan ediləndə, təhqir olunanda İran niyə susmuşdu? Həmin vaxt xalqımızın əsrlər boyu yaratdığı sərvətlərini vəhşicəsinə talan etmiş Ermənistana bir dəfə də olsun etiraz etməyən, üstəlik, düşmənlərə müxtəlif vasitələrlə dəstək verən İran bu gün Azərbaycanın İsrail Dövlətində səfirliyinin açılmasından niyə narahat olur?
Siyasi şərhçi bildirib ki, Azərbaycan müstəqil dövlətdir və uzun illərdir ki, uğurlu xarici siyasət yeridir. Bu siyasət ölkəmizin dünya birliyindəki mövqeyini getdikcə möhkənləndirir. Azərbaycanın hansı ölkələrlə diplomatik münasibətlər qurması öz daxili işidir. Ölkəmizin suveren hüquqlarına qarışmağa heç kəsin ixtiyarı yoxdur. İranın Ermənistanla qardaşlıq münasibətləri qurmasının əsas səbəblərindən biri Azərbaycanın öz gücü ilə işğal altında olan torpaqlarını düşmən tapdağından azad etməsi, tarixi ədaləti bərpa etməsidir. “Bütün bunlardan sonra İran parlamenti tərəfindən ölkəmizə qarşı irəli sürülmüş əsassız ittihamları qətiyyətlə rədd edirik. Bu, İranın özünü gülünc vəziyyətinə qoymasından və İslama qarşı ləkədən başqa bir şey deyil. Dövlətimizin başçısı ölkəmizə qarşı təxribat törədənlərə layiqli cavab verib: “Əgər kimsə fikirləşir ki, bizə qarşı cızılmış çirkin planlar həyata keçə bilər, səhv edir”. Bu fikirlər Azərbaycanın uğurlarını həzm edə bilməyənlərə açıq mesajdır”, - deyə Ə.Bədəlov bildirib.
Bölmənin digər xəbərləri
