DÜNYA
İspaniyada plastik məhsullara görə “yaşıl” verginin tətbiqi planlaşdırılır
Bakı, 5 iyun, AZƏRTAC
İspaniya vergiqoymanın köməyi ilə ekoloji problemlərə, o cümlədən plastik kütlədən hazırlanan məhsullardan istifadəyə qarşı mübarizəyə başlayacaq.
AZƏRTAC xarici KİV-lərə istinadla xəbər verir ki, "yaşıl" vergi ildə 724 min avro toplamağı nəzərdə tutur. Hökumət bu barədə qanunun 2021-ci ilin birinci yarısında qəbul edilməsini planlaşdırır.
"Yaşıl" qanunun məqsədi 2030-cu ilədək ölkə ərazisindəki bütün tullantıların miqdarını 2010-cu ilin göstəriciləri ilə müqayisədə 15 faiz azaltmaqdır. Bununla da, İspaniya Avropa təsisatlarının plastik tullantılara qarşı bir neçə il bundan əvvəl başladıqları mübarizəyə qoşulacaq.
Ölkədə 2021-ci ilin iyulundan birdəfəlik plastik məhsulların satışının qanunla qadağan olunacağı gözlənilir. Həmçinin tərkibində mikroplastiklər olan kosmetik və yuyucu vasitələr də qadağan ediləcək.