İspaniyanın Tenerife adasında 1800 hektar ərazi yanıb
Bakı, 17 avqust, AZƏRTAC
İspaniyanın Kanar adalarında Tenerife adasının şimal-şərqindəki təbiət parkında ötən gün başlayan meşə yanğını böyüyür.
AZƏRTAC xarici KİV-lərə istinadla xəbər verir ki, Kanar Adaları Muxtar Administrasiyasının prezidenti Fernando Klavixo Tenerifenin paytaxtı Santa Kruzda keçirdiyi mətbuat konfransında yanğının nəzarətdən çıxdığını bildirib. F.Klavixo qeyd edib ki, məqsəd yanğının genişlənməsinin qarşısını almaq və bölgə əhalisinin evlərini qorumaqdır. Çətin relyef şəraitində yanğının söndürülməsinə 14 yanğınsöndürmə təyyarəsi, 1 hidroplan, 250 yanğınsöndürən və hərbçilər cəlb olunub. Bu gün daha 2 təyyarənin göndəriləcəyi də açıqlanıb.
Adanın şimal-şərqində əsasən fermerlər və turistlərin məskunlaşdığı ərazilərdən 150-yə yaxın insan təxliyə edilib.
Digər tərəfdən, ötən ay Kanar adalarının La Palma adasında baş verən yanğınlarda 4 min 500 hektar ərazi külə dönüb, 4 min 255 nəfər isə bölgədən təxliyə edilib. Ötən həftə Kanar adalarında təsirli olan isti dalğası səbəbi ilə meşə yanğını riski ilə bağlı xəbərdarlıq edilib.
Bölmənin digər xəbərləri
