Azərbaycan Prezidenti İlham Əliyev iyulun 12-də İstanbul şəhərinin Sarıyer rayonundakı Heydər Əliyev parkında xalqımızın ümummilli liderinin abidəsinin açılışında iştirak etmək üçün Heydər Əliyev küçəsinə gəldi. Buraya toplaşan minlərlə sakin dövlətimizin başçısını böyük hörmət və hərarətlə qarşıladılar. Ətraf binada türk dünyasının dahi şəxsiyyətləri Atatürkün və Heydər Əliyevin portretləri, Azərbaycanın və Türkiyənin dövlət bayraqları asılmışdı.

“Azərbaycan-Türkiyə dostluğu və qardaşlığı əbədidir!”, “Dağlıq Qarabağ Azərbaycanındır və Azərbaycanın da olacaq!”, “Türkiyəyə xoş gəlmisiniz, Türkiyə xalqı Sizinlə fəxr edir!” sözləri yazılmış transparantlar diqqəti cəlb edir, ulu öndərlər Atatürkün və Heydər Əliyevin “Azərbaycanın kədəri bizim kədərimiz, sevinci bizim sevincimizdir”, “Biz bir millət, iki dövlətik” müdrik kəlamları səslənirdi.

Təntənəli açılış mərasimi ulu öndər Heydər Əliyevin tərcümeyi-halının oxunması ilə başlandı.

Mərasimi Sarıyer bələdiyyəsinin sədri Yusif Tülün açdı.