İstedad və əzmkarlığı birləşdirən Zərrin Şükürlə MÜSAHİBƏ
Bakı, 1 aprel, Fidan Əlizadə, AZƏRTAC
Gənc yaşda piano ifaçısı olmaq səbir və sevgi tələb edir. Uğur üçün güclü baza qurmaq, notları duymaq və ritmi hiss etmək vacibdir.
Müsahibimiz piano ifaçısı və bəstəkarlıq fəaliyyəti ilə məşğul olan Zərrin Şükürdür. O, musiqi sahəsində qazandığı uğurları, yarışmalarda iştirak təcrübələrini, gələcək planlarını AZƏRTAC-ın müxbiri ilə bölüşüb.
Musiqinin, sadəcə, sənət deyil, həyat tərzi olduğunu deyən həmsöhbətim bildirib ki, üç yaşında valideynlərinin dəstəyi ilə bu sahədə ilk addımlarını atıb.
“Musiqi təhsili almış valideynlərim istedadımı erkən yaşda kəşf edərək, məni Leopold və Mstislav Rostropoviçlər adına 21 nömrəli onbirillik musiqi məktəbinə gətirdilər. İlk dəfə dörd yaşımda bu məktəbdə təşkil edilən “Səhnəyə ilk addım” adlı konsertdə çıxış etdim. Bir həftə sonra isə kamança ifaçısını pianoda müşayiət etdim və həmin andan etibarən musiqinin sehrinə düşdüm. 2014-cü ildən 2022-ci ilədək Üzeyir Hacıbəyli adına Bakı Musiqi Akademiyasının nəzdindəki orta ixtisas musiqi məktəb-studiyasında təhsil aldım. 2023-cü ildən isə L. və M. Rostropoviçlər adına 21 nömrəli musiqi məktəbinin fortepiano şöbəsinin müdiri, 35 ildən artıq pedaqoji təcrübəyə malik Afaq Rəhimovanın sinfində təhsilimi davam etdirirəm. Hazırda IX sinif şagirdiyəm və ifaçılıq sənətində daha da təkmilləşmək üçün çalışıram”.
– Təhsil aldığınız müddətdə əldə etdiyiniz nailiyyətlər barədə danışmağınızı istərdik….
– Uğur yolum 2016-cı ildə başladı. İlk beynəlxalq müsabiqədə – “Kainat” Gənclər Mərkəzinin təşkil etdiyi İslam Dünyası Gənc Klassik Musiqi İfaçılarının V Beynəlxalq Müsabiqəsində ən kiçik iştirakçı adını qazandım. Daha sonra 2017-ci ildə “World Harmony” Beynəlxalq Müsabiqəsində laureat oldum, 2018-ci ildə isə İstanbulda keçirilən “Pera Uluslararası Müzik Festivalı”nda eyni uğura imza atdım. Müxtəlif illərdə İtaliya, Almaniya, Türkiyə, Rusiya və digər ölkələrin tanınmış pianoçu-pedaqoqlarının ustad dərslərində iştirak etdim. 2022-ci ildə Romada keçirilən “Sonja Pahor” Avropa Piano Müsabiqəsində, eləcə də Milanda təşkil olunan “Concorro per Crescere” müsabiqəsində laureat adına layiq görüldüm. 2023-cü ildə isə İzmir şəhərində baş tutan “ADS Piano Akademisi Uluslararası Gülsin Onay Piano Festivalı və Yarışması”nda “Özel Jüri Ödülü”nü qazandım. Bununla yanaşı, elmi tədqiqatlar və musiqi araşdırmaları ilə də məşğul oluram. 2023-cü ildə Türkiyədə keçirilən beynəlxalq elmi simpoziumlarda fortepiano ifaçılığı və milli musiqimiz barədə məqalələrlə çıxış etmişəm. Məqalələrim Rusiya, Türkiyə və Hindistanın nüfuzlu elmi jurnallarında dərc olunub.
– Maraqlıdır, beynəlxalq müsabiqələrdə iştirak sizə nə qazandırır?
– Hər bir müsabiqə mənim üçün yeni bir təcrübə və inkişaf imkanıdır. Bəzi yarışlar məni tanınmış münsiflər heyəti ilə görüşdürüb, onların dəyərli məsləhətləri mənə peşəkar baxış qazandırıb. Həmçinin belə tədbirlərdə iştirakçı olmaq, sənətin zirvəsinə aparan yolun nə qədər çətin və əzm tələb etdiyini öyrədir. Xüsusilə 2019-cu ildə keçirilən “Simurq” Uşaq Festivalı mənim üçün dönüş nöqtəsi oldu. Münsiflər heyətində Səidə Tağı-zadə , Mira Marçenko, Aleksandr Gindin, Yeganə Axundova, Murad Hüseynov, Fərid Adıgözəlzadə kimi nüfuzlu musiqiçilər yer alırdı. Bu festival-müsabiqə mənim musiqi baxışımı dəyişdi, ifaçılığımı yeni bir mərhələyə qaldırdı.
– Bəstəkarlıq fəaliyyətiniz nə vaxt başladı?
– 2018-ci ildən bəstəkarlıqla məşğulam. 2021-ci ildə Üzeyir Hacıbəylinin əsərlərinin dünya miqyasında təbliğinə həsr olunmuş bəstəkarlıq müsabiqəsində ən gənc bəstəkar adına layiq görüldüm. 2022-ci ildə 12 pyesdən ibarət “Qaranquş” adlı fortepiano albomum işıq üzü gördü. 2023-cü ildə isə “Şərq Nağılları” adlı rapsodiya əsərim (həmmüəllif Nuranə Zeynalova) dahi bəstəkar Fikrət Əmirovun 100 illik yubileyinə ithaf olundu. Bunlardan əlavə, 2025-ci ilin fevral ayında ilk solo konsertim təşkil olundu və bu tədbirdə “Zəfər Yolu” adlı fortepiano pyesim də təqdim edildi. Bu əsər Qarabağ müharibəsində qazandığımız zəfərə həsr olunub. Bütün bəstələrim müəllif hüquqları ilə qorunur.
– Əsərlərinizi sosial şəbəkələrdə dinləyicilərə çatdıra bilirsinizmi?
– Müasir dövrdə internet və sosial şəbəkələr musiqinin geniş kütləyə çatdırılmasında mühüm rol oynayır. Mən də bu imkandan maksimum istifadə edirəm. Yutub platformasında “ztempo” adlı kanalım var. Burada ifalarımı, Azərbaycan musiqi mədəniyyəti haqqında ingiliscə hazırladığım videoları paylaşaraq ölkəmizin musiqisini dünyaya tanıtmağa çalışıram. Bundan başqa, Harvard, Stanford və Yale kimi universitetlərin musiqi sahəsində olan kurslarında iştirak etmişəm. Xarici dillərə olan marağım da bu sahədə işimi asanlaşdırır – ingilis, rus, alman və italyan dillərində sərbəst ünsiyyət qururam.
– Gələcək planlar və yeni yaradıcılıq üfüqləriniz barədə oxucularımıza nələr söyləyə bilərsiniz?
– Planlarım çoxdur və hər biri əzmkarlıq, çalışqanlıq tələb edir. Əsas məqsədim Azərbaycan musiqisini dünya miqyasında tanıtmaq və beynəlxalq səhnələrdə həm pianoçu, həm də bəstəkar kimi çıxış etməkdir. Bunun üçün daim öz üzərimdə işləyir, repertuarımı genişləndirirəm. Mənim üçün əsas prinsip budur: “Dünənki Zərrinlə yarışmaq və hər gün bir addım irəli getmək”.
Bölmənin digər xəbərləri
