İsveç Azərbaycanlıları Konqresinin nümayəndələri Şərqi Avropada “dondurulmuş” münaqişələrə həsr olunmuş seminarda iştirak etmişlər
Bakı, 26 aprel (AZƏRTAC). İsveç Azərbaycanlıları Konqresinin (İAK) nümayəndələri Şərqi Avropada “dondurulmuş” münaqişələrə həsr olunmuş seminarda iştirak etmişlər. İsveç Beynəlxalq Araşdırmalar İnstitutu tərəfindən təşkil edilmiş seminarda Dağlıq Qarabağ münaqişəsi xüsusi qabardılmışdır. Tədbirin əsas iştirakçıları Avropa Şurasının insan hüquqları üzrə keçmiş komissarı Tomas Hammarberq, İsveçrə Xarici İşlər Nazirliyinin Şərqi Avropa və Mərkəzi Asiya məsələləri şöbəsinin müdiri Martin Haqstrem və jurnalist Torqni Hinnem olmuşdur.
AZƏRTAC İAK-ın mətbuat xidmətinə istinadla xəbər verir ki, tədbirdə çıxış edən İsveç XİN-in nümayəndəsi M.Haqstrem vurğulamışdır ki, İsveç dövlətlərin ərazi bütövlüyü barədə beynəlxalq hüquqdan çıxış edərək, Şərqi Avropa ərazisində, o cümlədən Azərbaycanın işğal edilmiş ərazilərində qondarma respublikaları tanımır. O, əmin olduğunu bildirmişdir ki, çoxşaxəli “Şərq tərəfdaşlığı” layihəsi Azərbaycan ilə Ermənistan arasında dialoqun yaranmasına töhfə verə bilər. M.Haqstremin sözlərinə görə, konkret sülh sazişinin olmaması nəzərə alınsa, Dağlıq Qarabağ münaqişəsi daha mürəkkəb münaqişədir və münaqişənin eskalasiyasının qarşısının alınması üçün Aİ tərəfindən işlər aparılır.
Seminarda İAK-ın nümayəndələrinə İsveç Beynəlxalq Münasibətlər İnstitutunun jurnalının yeni buraxılışı təqdim olunmuşdur. Jurnalda Dağlıq Qarabağ münaqişəsinin indiki vəziyyətinə ayrıca məqalə həsr olunmuşdur. Məqalə müəllifi Cənubi Qafqazda siyasi prosesləri təsvir edərək Dağlıq Qarabağı “xristian Ermənistanının tarixi ərazisi” kimi göstərmişdir. İAK nümayəndələri bu kobud səhvə dərhal reaksiya verərək təxirəsalınmaz tədbirlər görülməsini tələb etmişlər. Beynəlxalq Münasibətlər İnstitutunun nümayəndələri üzrxahlıq edərək həmin mətnə tez bir vaxtda düzəlişlər ediləcəyinə söz vermişlər.
Bölmənin digər xəbərləri
