İsveçdə 2010-cu ildən bəri istixana qazı emissiyalarında ən böyük artım qeydə alınıb
Stokholm, 19 iyun, Nərgiz Cəfərli, AZƏRTAC
İsveç Ətraf Mühitin Mühafizəsi Agentliyinin ilkin statistik məlumatlarına görə, 2024-cü ildə İsveçdə istixana qazları emissiyaları 2023-cü illə müqayisədə 7% artaraq 47,5 milyon ton CO₂ ekvivalentinə çatıb. Bu, 2010-cu ildən bəri ən yüksək artımdır.
AZƏRTAC xəbər verir ki, əsas səbəb avtomobil nəqliyyatı və tikinti texnikasında qazıntı dizel yanacağının istifadəsinin artması olub ki, burada emissiyalar müvafiq olaraq 24 faiz və 32 faiz artıb. Bu, 2024-cü ilin yanvarından mütləq bioyanacaqların payının azalması ilə əlaqədardır.
Elektrik və istilik təchizatı sektorunda da emissiyaların artması (+5%) qeydə alınıb, sənayedə isə emissiyalar 5% azalıb.
Agentlik xəbərdarlıq edir ki, belə bir artım İsveçin Aİ çərçivəsində iqlimlə bağlı öhdəliklərinə nail olunmasını çətinləşdirəcək.
İqlim və ətraf mühit naziri Romina Purmoxtari mətbuat katibi vasitəsilə yazılı şərhlə kifayətlənərək, “Dagens Nyheter” ilə müsahibədən imtina edib. O, artımı “müvəqqəti” adlandırıb və əmin edib ki, hökumət 2026-cı il büdcəsi üçün əlavə tədbirlər üzərində işləyir. Nazir, həmçinin əmin olduğunu bildirib ki, İsveç hələ də 2030-cu ilə qədər nəqliyyat sektorunda Aİ-nin iqlim hədəflərinə nail ola bilər.
Bölmənin digər xəbərləri
