İtaliyanın Sardiniya adasında meşə yanğınları baş verib, 600 nəfər təxliyə olunub
Roma, 7 avqust, AZƏRTAC
İtaliyanın Sardiniya adasının şimal-şərq və cənub sahillərində meşə yanğınları baş verib, bölgədən ümumilikdə 600 nəfər təxliyə edilib.
AZƏRTAC xəbər verir ki, adada irili-xırdalı 42 yanğının baş verdiyi və onlardan 12-sinin əhatə dairəsinin genişləndiyi, yanğınların söndürülməsi üçün mülki müdafiə qüvvələrinin səfərbər olunduğu bildirilib. Əraziyə, həmçinin yanğınsöndürən təyyarə və helikopterlər cəlb edilib.
Adanın cənubunda yanğınların əhatə dairəsinin və fəsadlarının böyük olduğu bildirilib. Bəzi avtomobil yolları müvəqqəti olaraq nəqliyyatın hərəkətinə bağlanıb. Ətraf ərazilərdəki fermalar, evlər, düşərgələr və kurort komplekslərindən insanlar təxliyə olunur. Yanğının bir neçə dənizkənarı villaya təhlükəli dərəcədə yaxınlaşdığı bildirilib.
Hazırda adada hökm sürən küləkli hava şəraiti yanğınların söndürülməsinə mane olur.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
